முட்டாள்கள் தினம் உருவானது எப்படி...?

Report Print Sujitha Sri in கட்டுரை

நம் அருகில் இருப்பவரை, எதிரில் இருப்பவரை அல்லது கண்காணா இடத்தில் இருப்பவரை கூட நாடிச் செல்லும் நாள் இன்றாகும்.

அப்படியென்ன சிறப்பு இன்றைய நாளில்...? ஆம், இன்று முட்டாள்கள் தினம். தந்தையர் தினம், அன்னையர் தினம், மகளிர் தினம், சிறுவர்கள் தினம் உள்ளிட்ட பல தினங்களை நாம் கொண்டாடி வருகின்றோம்.

ஆனால் இவ்வாறான தினங்களுக்கு வழங்கப்படுகின்றன ஒரு தனித்துவமானது முட்டாள்கள் தினத்திற்கு வழங்கப்படுவதில்லை. இதனால் ஏப்ரல் முதலாம் திகதி முட்டாள்கள் தினம் என்பதை பலரும் அதிகளவில் நினைவில் வைத்துக் கொள்வதில்லை.

இதனால் தாம் அறிவாளிகள் என்று கருதிக் கொள்பவர்களால் சிலர் முட்டாள்களாக்கப்படுகின்றனர். இந்த தினத்தை பற்றி நாம் பார்த்தோமானால் நமக்கு நிச்சயம் இந்த தினம் எங்கு தோற்றம் பெற்றது என்ற கேள்வி மனதில் எழும்.

அதோடு எதற்காக இந்த தினம் உருவாக்கப்பட்டது என்ற கேள்வியும் கிளைவிடும். இந்த முட்டாள்கள் தினமானது பிரான்சில் முதன் முதலாக கொண்டாடப்பட்டுள்ளதாக தெரிவிக்கப்படுகிறது.

அத்துடன் 16ஆம் நூற்றாண்டு வரை ஐரோப்பாவின் பல நாடுகளிலும் ஏப்ரல் முதலாம் திகதி, புத்தாண்டு தினமாக கடைபிடிக்கப்பட்டு வந்துள்ளது.

இந்த நிலையில் அப்போதைய ஜூலியன் நாட்காட்டியிலும் இவ்வாறு தான் இருந்துள்ளது. பின் 13ஆம் கிரிகோரி என்ற போப் ஆண்டவர், 1582 பெப்ரவரி 29ஆம் திகதி புதிய நாட்காட்டியை அறிமுகப்படுத்தியுள்ளார்.

இதில் ஜனவரி முதலாம் திகதி புத்தாண்டாக மாற்றப்பட்டுள்ளது. இதனை ஜெர்மனி உள்ளிட்ட பல நாடுகள் உடனடியாக ஏற்கவில்லை.

எனினும் ஸ்பெயின், போர்த்துக்கல், இத்தாலி போன்ற நாடுகள் இந்த நாட்காட்டியை 1582 அக்டோபர் முதல் பயன்படுத்த துவங்கியுள்ளன.

இதனையடுத்து 1752இல் இங்கிலாந்து, அமெரிக்கா மற்றும் ஆங்கிலேயர் ஆட்சியின் போது இந்தியாவிலும் இந்த நாட்காட்டி புழக்கத்திற்கு வந்துள்ளது.

இவ்வாறான சந்தர்ப்பத்தில் புதிய நாட்காட்டியை ஏற்காத நாடுகளை கிண்டல் செய்வதற்காக 'முட்டாள்கள் தினம்' என ஏப்ரல் முதலாம் திகதி அழைக்கப்பட்டதாக கூறப்படுகிறது.

எனினும் ஏப்ரல் முதலாம் திகதி முட்டாள்கள் தினமாக கொண்டாடப்படுகின்றமைக்கு வரலாறுகளும், கட்டுக்கதைகளும் பல உள்ளன. எனினும் அதில் எந்த வரலாறு முட்டாள் தினம் தோன்ற காரணம் என்பது உறுதியாகவில்லை.