மேன்முறையீட்டு நீதிமன்றின் உத்தரவினை அனைவரும் ஏற்றுக்கொள்ள வேண்டும்: ஐ.தே.க
[ வெள்ளிக்கிழமை, 04 சனவரி 2013, 02:19.13 AM GMT ]

நாடாளுமன்றம் உள்ளிட்ட அனைத்து பிரஜைகளும் மேன்முறையீட்டு நீதிமன்றின் உத்தரவினை ஏற்றுக்கொள்ள வேண்டுமென ஐக்கிய தேசியக் கட்சி வலியுறுத்தியுள்ளது.

பிரதம நீதியரசர் சிரானி பண்டாரநாயக்கவிற்கு எதிரான குற்றவியல் பிரேரணை தொடர்பில் நாடாளுமன்றத் தெரிவுக்குழு விசாரணை நடத்த முடியாது என்ற மேன்முறையீட்டு நீதிமன்றின் தீர்ப்பினை அனைத்து தரப்பினரும் ஏற்றுக்கொள்ள வேண்டுமென அக்கட்சியின் நாடாளுமன்ற உறுப்பினர் லக்ஸ்மன் கிரியல்ல தெரிவித்துள்ளார்.

குற்றவியல் பிரேரணை அரசியல் அமைப்பிற்கு முரணானது என மேன்முறையீட்டு நீதிமன்றம் அறிவித்துள்ளது.

நாட்டின் அரசியல் சாசனம் தொடர்பில் சட்ட வரைவிலக்கணத்தை வழங்கும் அதிகாரம் மேன்முறையீட்டு நீதிமன்றிற்கு மட்டுமே காணப்படுகின்றது. எனவே நாடாளுமன்றம் உள்ளிட்ட அனைத்து தரப்பினரும் இந்தத் தீர்ப்பை ஏற்றுக்கொள்ள வேண்டும்.

அரசியல் அமைப்பிற்கு முரணாக செயற்பட்ட காரணத்தினால் எதிர்க்கட்சி உறுப்பினர்கள் நாடாளுமன்றத் தெரிவுக்குழுவிலிருந்து விலகிக் கொண்டனர்.

திவிநெகும சட்டம் தொடர்பில் நாடாளுமன்றில் விசேட உரையாற்றிய சபாநாயகர், நாட்டின் அரசியல் சாசனம் தொடர்பில் சட்ட வரைவிலக்கணம் வழங்கக் கூடிய அதிகாரம் மேன்முறையீட்டு நீதிமன்றிற்கு காணப்படுவதாக தெரிவித்திருந்தார்.

எனவே, மேன்முறையீட்டு நீதிமன்றின் தீர்ப்பை சபாநாயகர் ஏற்றுக் கொண்டு செயற்பட வேண்டுமென லக்ஸ்மன் கிரியல்ல தெரிவித்துள்ளார்.

பிரதம நீதியரசர் சிரானி பண்டாரநாயக்க தாக்கல் செய்த மனுவை பரிசீலனை செய்த மேன்முறையீட்டு நீதிமன்றம் நேற்று அளித்த தீர்ப்பு தொடர்பில் வெளியிட்ட விசேட ஊடக அறிக்கையில் அவர் இதனைக் குறிப்பிட்டுள்ளார்.

Copyright (c) 2008-14 TamilWin.com, All rights reserved.