International
Notification
Notification
Submit Cancel

தொம்பே பொலிஸ் நிலையம் மீது பொது மக்கள் தாக்குதல்! : பெரும் பதற்றம் நீடிப்பு

கம்பஹா மாவட்டத்தில் உள்ள தொம்பே பொலிஸ் நிலையத்தின் மீது பிரதேச மக்கள் தாக்குதல் நடத்தியுள்ளனர். இதனால் பொலிஸாருக்கும், பொதுமக்களுக்கும் இடையில் முறுகல் நிலை ஏற்பட்டுள்ளது.

நேற்றிரவு கைது செய்யப்பட்ட சந்தேக நபர் ஒருவர் பொலிஸ் நிலையத்தில் உயிரிழந்த காரணத்தினால் இந்த குழப்ப நிலைமை ஏற்பட்டுள்ளது.

சந்தேக நபர் திடீரென உயிரிழந்தமையினால் ஆத்திரமுற்ற மக்கள் தொம்பே பொலிஸ் நிலைத்திற்குள் அத்துமீறி பிரவேசித்து, பொலிஸ் நிலையத்திற்கு தீ வைத்துள்ளதாக அங்கிருந்து கிடைக்கும் தகவல்கள் தெரிவிக்கின்றன.

பொலிஸ் நிலையத்திற்கு ஏற்பட்ட சேதங்கள் பற்றிய விபரங்கள் இன்னமும் வெளியிடப்படவில்லை.

பிரதேசத்தில் பதற்றம் நிலவி வருவதாகவும், பாதுகாப்பு கடமைகளுக்கு விசேட அதிரடிப்படை பொலிஸார் அனுப்பி வைக்கப்பட்டுள்ளதாகவும் தெரிவிக்கப்படுகிறது.


தொம்பே பொலிஸ் நிலைய மோட்டார் சைக்கிளுக்கு தீ வைத்து மக்கள் எதிர்ப்பு

தொம்பே பிரதேசத்தில் இடம்பெற்ற அசாதாரண சூழ்நிலை காரணமாக பிரதேசவாசிகளால் பொலிஸ் நிலைய சொத்துக்களுக்கு சேதம் விளைவிக்கப்பட்டுள்ளதாக பொலிஸ் ஊடகப் பேச்சாளர் மெக்சி புரொக்டர் தெரிவித்துள்ளார்.

தொம்பே பொலிஸ் நிலையப் பகுதியில் அமைதியை நிலைநாட்ட அங்கு விசேட அதிரடிப்படையினரும் கம்பஹா பொலிஸ் நிலையப் பொலிஸாரும் அனுப்பி வைக்கப்பட்டுள்ளதாக அவர் குறிப்பிட்டார்.

குற்றச்செயல்கள் பலவற்றுடன் தொடர்புடைய இரு சந்தேகநபர்கள் நேற்று கைது செய்யப்பட்ட நிலையில் அவர்கள் வழங்கிய தகவலின்படி மற்றுமொரு சந்தேகநபரும் கைது செய்யப்பட்டுள்ளார்.

கைது செய்யப்பட்டவர், களவாடியதாகக் கூறப்படும் பொருட்கள் இருக்கும் இடத்தை காண்பிப்பதாக பொலிஸாருக்கு அறிவித்ததை அடுத்து பொலிஸார் அவரை ஜீப் ஒன்றில் ஏற்றி அழைத்துச் சென்றுள்ளனர்.

அப்போது குறித்த சந்தேகநபர் ஜீப்பில் இருந்து விழுந்து மரணமானதாக பொலிஸ் ஊடகப் பேச்சாளர் தெரிவித்துள்ளார்.

இந்த மரணத்தை அடிப்படையாகக் கொண்டு தொம்பே பிரதேசவாசிகள் பொலிஸ் மோட்டார் சைக்கிள் ஒன்றுக்கு தீ வைத்ததாகவும் அத்தீ பொலிஸ் நிலைய கட்டடம் வரை பரவியுள்ளதாகவும் அங்கிருந்து வரும் செய்திகள் தெரிவிக்கின்றன.