இங்கிலாந்து மற்றும் ஐரோப்பிய நாடுகளில் இருந்து ஜெனீவாவில் 2000இற்று மேற்பட்ட மக்கள் அங்கு கூடிக் குரல் எழுப்பினார்கள்.

அதன் தொடர்ச்சியாக அதே நாளில் நாடு கடந்த தமிழீழ அரசின் அனுசரணையில், கனடாத் தமிழர் இணையத்தின் ஒருங்கிணைப்பில் கனடாவிலும் மக்கள் பெருமளவில் கூடி தமது ஆதரவு எழுச்சியை வெளிப்படுத்தினார்கள்.

டொரோண்டோ நகரில் அமெரிக்கத் துணைத் தூதரகத்தின் முன்பாக பிற்பகல் 3 மணிக்கு ஆரம்பமான நிகழ்வு மாலை 6 மணிக்குப் பின் நிறைவடைந்தது.பல நூற்றுக் கணக்கான பதாதைகளை மக்கள் தாங்கியிருந்தார்கள். கூடி நின்ற மக்கள் பல கோசங்களையும் எழுப்பி அனைவரதும் கவனத்தைக் கவர்ந்தார்கள்.

உலகப் புகழ் பெற்ற பத்திகையாளர், முள்ளிவாய்க்கால் இறுதி நிகழ்வுகளில் இருந்த ஒரே சாட்சி வெள்ளைக்கொடி சரணடைதலை ஒருங்கிணைக்க முன்னின்றவர், தனது ஒரு கண்ணையும் அங்கே பறிகொடுத்தவர், சிரியாவில் நடக்கும் போர் வலயத்தில் செய்தி சேகரிக்கும் போது காலமானவர் ஆகிய மேரி கொல்வின் அம்மையாரின் திருவுருவப் படம் வைக்கப்பட்டு மலர்களால் அலங்கரிக்கப்பட்டு அஞ்சலி செலுத்தப்பட்டது.

இந்தச் சிறப்பான நிகழ்வின் நிறைவு நிகழ்ச்சிகள் அகவணக்கத்தோடு ஆரம்பித்து உரைகள் இடம்பெற்றன.

அங்கு உரையாற்றிய கனடாத் தமிழர் இணையத்தின் தலைவரும் நாடு கடந்த தமிழீழ அரசின் அரசவை உறுப்பினருமான வின். மகாலிங்கம்,

"ஈழத் தமிழர் பிரச்சனை சரித்திரத்தில் முதல் முறையாக ஐக்கிய நாடுகளின் மனித உரிமைப் பேரவைக்குச் சென்றுள்ளது. இது தமிழரின் ஒரு வரலாற்றுத் திருப்புமுனையாகும்.

இச்சந்தர்ப்பத்தைப் பயன்படுத்தி நாடு கடந்த தமிழீழ அரசாங்கம், தமிழர் அமைப்புகளும் நடத்தும் அரசியல் ராஜதந்திரச் செயற்பாடுகளுக்கு மக்கள் பலமும் சேரவேண்டுமென்ற பிரதமர் உருத்திரகுமாரனின் சிந்தனைக்கேற்ப ஜெனீவாவில் இன்று மாபெரும் மக்கள் ஆதரவுப் பேரணி ஐரோப்பியத் தமிழரால் நடுத்தப்பட்டுள்ளது.

அதற்குப் பக்கபலமாக அமெரிக்க நியுயோர்க்கிலும் இந்த இடத்திலும் மக்கள் எழுச்சிப் பேரணிகள் நடத்தப்பட்டது. சர்வதேச ராஜதந்திரச் செயற்பாடுகளில் ஈடுபட்டிருக்கும் தமிழர் தரப்புகளுக்கும் சர்வதேச நாடுகளுக்கும் ஆதரவையும் உற்சாகத்தையும் கொடுத்து அவர்கள் தளர்வடையாமலும் பின்வாங்காமல் முன்னகர்த்தவும் மக்கள் பேரெழுச்சி அவசியம்.

இலங்கையில் முப்படையினரதும் அரச இயந்திரத்தினதும் உதவியோடு நடக்கும் மகிந்தவின் போலித்தனமான மக்கள் ஆர்ப்பாட்டங்களுக்கு தமிழ் மக்களும் பதிலடி கொடுக்க வேண்டும்.

தமிழருக்கான விடிவு காலம் எதிரே தெரிகின்றது.தியாகம் நிறைந்த எமது விடுதலைப் போராட்டங்கள் வீண் போகவில்லை. மக்கள் புத்தெழுச்சி பெற்று மீண்டும் இன்னும் இன்னும் அதிகமாகச் செயற்பட வேண்டும்" என்று குறிப்பிட்டார்.

அங்கு தமிழிலும் ஆங்கிலத்திலும் உரை ஆற்றிய நாடு கடந்த தமிழீழ அரசின் அரசவை உறுப்பினர் ஈழவேந்தன் நாடு கடந்த தமிழீழ அரசு வெளியிட்ட "WE ACCUSE WAR CRIMES AND GENOCIDE" என்ற புத்தகத்தில் இருந்து "ஸ்ரீலங்காவின் LLRC அறிக்கையில் உள்ள விடயங்களையும் சேர்த்து அனைத்துப் போர்க் ற்றங்களையும் மனித உரிமை மீறல்களையும் விசாரிப்பதற்கு ஒரு சர்வதேச விசாரணையை ஏற்படுத்தக் கூடிய பிரேரணையை நிறைவேற்றுமாறு மனித உரிமை உறுப்பு நாடுகளைக் கேட்டுக் கொள்வதாக நாடு கடந்த தமிழீழ அரசின் பிரதமர் கூறி இருப்பதைச் சுட்டிக்காட்டினார்.

நிறைவாக வின் மகாலிங்கம் சர்வதேசத்திற்கான விண்ணப்பம் ஒன்றை முன்வைத்தார்.

"ஐ.நா சபையினால் நியமிக்கப்பட்ட நிபுணர்கள் குழு அறிக்கையின் படி 40,000 தமிழர்கள் யுத்தத்தின் கடைசி கட்டத்தில் கொல்லப்பட்டுள்ளனர். யுத்தத்தின் போது, இலங்கை அரசு பொது மக்களைக் கொல்ல கொத்து குண்டுகள், பொஸ்பரஸ் குண்டுகள் மற்றும் இரசாயன ஆயுதங்களை பயன்படுத்தி உள்ளனர்.

மேலும், பாதுகாப்பு வலயங்கள் என அறிவிக்கப்பட்ட மருத்துவமனைகள் ,பள்ளிகள், தேவாலயங்களில் மற்றும் கோயில்கள் போன்ற இடங்களில் தாக்குதல்களை நடத்தினர்.

இலங்கை நாட்டின் மக்கள் தொகை கணக்கெடுப்பு அறிக்கைகளின் படி 146, 000 தமிழர்கள் கணக்கில் இல்லை.

எனவே, எங்களுக்கு நீதி கிடைக்குமாறு கோரிக்கை விடுக்கின்றோம். சர்வதேச நீதிமன்றத்தின் மூலம் போர்க்குற்றங்கள் மற்றும் மனித உரிமை மீறல்களை விசாரிப்பதற்கு மற்றும் தமிழர்கள் தங்கள் தொலைந்த அரசியல் சுதந்திரம் மற்றும் கௌரவம் மற்றும் சமத்துவத்துடன் வாழ சர்வதேச சமூகத்திற்கு வலியுறுத்துகின்றோம். என்று அவர் கூறியதோடு,

இலங்கையில் உண்மையான ஜனநாயகம், நல்லாட்சி, மற்றும் சட்டத்தின் ஆட்சியை நிலை நிறுத்த அமெரிக்கா மற்றும் கனடா ஆகிய நாடுகள் மேற்கொள்ளும் முயற்சிகளுக்கு நன்றியையும் தெரிவித்தார்.