ஐ.நா. தீர்மானம் இலங்கையில் நீதியை நிலைநாட்டுவதற்கு சிறந்த நடவடிக்கை!– ராதிகா சிற்சபைஈசன் பா.உ.

ஐக்கிய நாடுகள் சபையின் மனிதவுரிமை அமர்வில் மேற்கொள்ளப்பட்ட தீர்மானம் இலங்கைத் தீவில் நீதியை நிலைநாட்டுவதற்கான முதற்படி என்று கனடியப் பராளுமன்ற உறுப்பினர் செல்வி. ராதிகா சிற்சபைஈசன் தெரிவித்துள்ளார்.

கனடாவின் எதிர்க்கட்சியான புதிய ஜனநாயகக் கட்சியின் சார்பில் விடுக்கப்பட்ட அறிக்கையிலேயே மேற்படி கருத்தை மேற்படி கட்சியின் மனிதவுரிமைகளிற்குப் பொறுப்பான பாராளுமன்ற உறுப்பினர் மற்றும் வெளிவிவகாரங்களிற்குப் பொறுப்பான உறுப்பினருடன் இணைந்து தெரிவித்துள்ளார்.

புதிய ஜனநாயகக் கட்சியின் வெளிவிவகாரங்களிற்கு பொறுப்பான பாராளுமன்ற உறுப்பினர் ஹெலன் லவடிர் கருத்துத் தெரிவிக்கையில் தங்களது கட்சி நீணட காலமாக இந்த விவகாரத்தை சர்வதேச நாடுகள் கவனத்திலெடுத்து உரிய விசாரணைக்கு உத்தரவிட வேண்டுமெனக் கேட்டு வருவதாகத் தெரிவித்தார்.

மேற்படி கட்சியின் மனிதவுரிமை விவகாரங்களிற்கான பாராளுமன்ற உறுப்பினர் வெய்ன் மார்சன் கருத்துத் தெரிவிக்கையில் இந்த ஆரம்ப முயற்சி இலங்கையில் நீண்டு நிலைக்கும் ஒரு நிரந்தர சமாதான சூழலிற்கு வழிவகுக்கும் எனத் தான் நம்புவதாகத் தெரிவித்தார்.

இது குறித்து மேலும் கருத்துத் தெரிவித்த ராதிகா சிற்சபைஈசன் உலகின் பார்வை தற்போது இலங்கையில் நிலை கொண்டுள்ள இத் தருணத்தைப் பயன்படுத்தி நாங்கள் அனைவருமே மரியாதையுடன் வாழக்கூடிய ஒரு தீர்வுக்கு வழி செய்ய வேண்டுமென்றும் இந்தப் போரில் பாதிக்கப்பட்ட மக்களிற்கு நீதி கிடைக்க வேண்டுமென்றும் தெரிவித்தார்.

advertisement