International
Notification
Notification
Submit Cancel

மட்டு.புதூர் மக்கள் வங்கியில் கொள்ளையிடப்பட்ட நகை உரிமையாளர்களுக்கு நஸ்டஈடு

மட்டக்களப்பின் புறநகர்ப்பகுதியான புதூரில் உள்ள மக்கள் வங்கியில் கடந்த வருடம் கொள்ளையிடப்பட்ட நகைகளின் உரிமையாளர்களுக்கு நஸ்ட ஈடு வழங்கப்பட்டுள்ளன.

கடந்த ஆண்டு ஆனி மாதம் 30ஆம் திகதி வானில் வந்த கொள்ளையர்களினால் புதூர் மக்கள் வங்கிக்கிளை கொள்ளையிடப்பட்டிருந்தது.

இது தொடர்பில், தீவிர விசாணை மேற்கொண்டிருந்த பொலிஸார் சம்பவத்துடன் தொடர்புபட்டிருந்த நபர்களை கைதுசெய்திருந்ததுடன் அவர்களிடம் இருந்து நகைகளையும் மீட்கப்பட்டனர்.

எனினும், சந்தேகநபர்களிடம் தொடர்ந்தும் விசாரணைகள் இடம்பெற்றுவருவதால், அவற்றின் காலதாமதத்தை உணர்ந்து வங்கியில் வைப்புச் செய்திருந்த வாடிக்கையாளர்களுக்கான நஸ்ட ஈடு வழங்கும் பணியை வங்கி மேற்கொண்டுள்ளது.

இதன் ஆரம்ப வைபவம் இன்று, மட்டக்களப்பு மக்கள் வங்கியின் நகரக் கிளையில் வங்கி முகாமையாளர் எஸ்.சரவணபவன் தலைமையில் இடம்பெற்றது. இதில் பிரதம அதிதியாக மக்கள் வங்கியின் மட்டக்களப்பு மாவட்ட பிராந்திய முகாமையாளர் ஏ.அப்துல் அஸீஸ் கலந்துகொண்டார்.

குறித்த வங்கியில் இருந்து 2660 பேரின் தங்க நகைகள் கொள்ளையிடப்பட்டிருந்ததாகவும் அவர்களுக்கான முழுமையான நஸ்ட ஈடு வழங்கப்பட்டு வருவதாகவும் அதற்காக, சுமார் 20 கோடி ரூபா ஒதுக்கப்பட்டுள்ளதாகவும் பிராந்திய முகாமையாளர் தெரிவித்தார்.

தற்போது சந்தைப் பெறுமதிக்கு ஏற்ப உரியவர்களின் நகைகளுக்கு நஸ்ட ஈடு வழங்கப்பட்டுவருவதாக தெரிவித்த அவர், அதற்கு மேலதிகமாக சேதாரம் மற்றும் செய் கூலிக்குரிய பணமும் வழங்கப்பட்டுவருவதாகவும் அவர் தெரிவித்தார்.

இந்த நடவடிக்கை கட்டம் கட்டமாக மேற்கொள்ளப்பட்டு அனைத்து வாடிக்கையாளர்களுக்குரிய நஸ்டஈடும் வழங்கப்படும் என மாவட்ட பிராந்திய முகாமையாளர் ஏ.அப்துல் அஸீஸ் தெரிவித்துள்ளார்.