தீர்வுத் திட்டம் முன்வைக்கப்படாமைக்கு கூட்டமைப்பும், ஐ.தே.கட்சியுமே பொறுப்பு: அராசங்கம்

தீர்வுத் திட்டம் முன்வைக்கப்படாமைக்கு தமிழ்த் தேசியக் கூட்டமைப்பும், ஐக்கிய தேசியக் கட்சியும் பொறுப்பை ஏற்க வேண்டுமென அரசாங்கம் தெரிவித்துள்ளது.

ஐக்கிய தேசியக் கட்சியும், தமிழ்த் தேசியக் கூட்டமைப்பும் தீர்வுத் திட்ட பேச்சுவார்த்தைகளில் கலந்து கொள்ளத் தவறியுள்ளதாக அமைச்சர் நிமால் சிறிபால டி சில்வா பிரபல வார இறுதி பத்திரிகை ஒன்றுக்கு அளித்த செவ்வியில் தெரிவித்துள்ளார்.

மேலும் அவர் கூறுகையில், நாடாளுமன்றத் தெரிவுக்குழு தொடர்பில் குறித்த கட்சிகள் உரிய பதில் அளிக்கத் தவறியுள்ளன.

13ஆம் திருத்தச் சட்டம் அமுல்படுத்தப்பட வேண்டுமென இந்தியா கட்டாயப்படுத்தவில்லை.

தமிழ் மக்களின் ஏகப் பிரதிதிகளாக தமிழ்த் தேசியக் கூட்டமைப்பினை ஏற்றுக்கொள்ள முடியாது. பிரச்சினைகளுக்கு தீர்வு காண நாடாளுமன்றத் தெரிவுக்குழுவில் பங்கேற்க வேண்டியது அவசியமானது.

ஹிலாரி கிளிண்டனிடமோ அல்லது எஸ்.எம். கிருஸ்ணாவிடமோ தெரிவிப்பதன் மூலம் இலங்கைப் பிரச்சினைக்கு தீர்வு காண முடியாது.

கடத்தல்கள், காணாமல் போதல்கள் தொடர்பான குற்றச்சாட்டுக்களை ஊடகங்கள் அரசாங்கம் மீது சுமத்தி வருகின்றன.

எவரேனும் மறைந்து கொண்டால், யாரேனும் காணாமல் போனால் அவரைக் கடத்தியது அரசாங்கம் தான் என ஊடகங்கள் தெரிவிக்கின்றன.

கிழக்கு மாகாண முதலமைச்சர் வேட்பாளராக அரசாங்கம் முஸ்லிம் ஒருவரை நியமிக்கத் திட்டமிட்டுள்ளதாக வெளியாகி வரும் செய்திகள் வெறும் வதந்தியே என தெரிவித்துள்ளார்.

advertisement