International
Notification
Notification
Submit Cancel

ஹிருனிகா பிரேமசந்திரவிற்கு அநாமதேய கொலை அச்சுறுத்தல்: விசாரணை மேற்கொள்ள நீதவான் பணிப்பு

முல்லேரிய துப்பாக்கிப் பிரயோக சம்பவத்தில் கொல்லப்பட்ட பாரத லக்ஷ்மன் பிரேமசந்திரவின் மகளான ஹிருனிகா பிரேமசந்திர, நேற்றிரவு தமக்கு அநாமதேய கொலை அச்சுறுத்தல் விடுக்கும் தொலைபேசி அழைப்பு ஒன்று கிடைத்ததாக முறையிட்டுள்ளார்.

ஒப்பந்தம் ஒன்றின் அடிப்படையில் தம்மை கொலை செய்ய திட்டம் ஒன்று உள்ளதாக அந்த தொலைபேசி குரல் கூறியதாக ஹிருனிகா தெரிவித்துள்ளார்.

இதுகுறித்து அவர் மேலும் தெரிவிக்கையில்,

நான் பெயர் குறிப்பிடப்படாத தொலைபேசி அழைப்பொன்றின் மூலம் அச்சுறுத்தப்பட்டேன். என்னை கொலை செய்வதற்கு ஒப்பந்த அடிப்படையில் திட்டம் ஒன்று வகுக்கப்பட்டுள்ளதாக அந்த குரல் எச்சரித்தது.

தற்போது இடம்பெற்று வரும் விசாரணைகளின் அடிப்படையில் இது முதன் முறையாக விடுக்கப்பட்ட அச்சுறுத்தலாகும். அது சிலவேளைகளில் உண்மையாகவும், இருக்கலாம் என நான் நம்புகிறேன் என்றும் அவர் குறிப்பிட்டார்.

இதுகுறித்து ஹிருனிகா காவல்துறையில் முறைப்பாடு ஒன்றையும் செய்துள்ளார். தமது வாழ்க்கைக்கு இது பெரும் அச்சுறுத்தலாக அமையும் என அவர் குறிப்பிடுகிறார்.

தற்போது நிலைமையில் தமக்கு உறுதியாக புலப்படாத ஒருவிடயம் தொடர்பாக காவல்துறையின் பாதுகாப்பை பெறுவதற்காக தாம் காவல்துறையை நாடி முறைப்பாடுகளை செய்துள்ளதாகவும் ஹிருனிகா பிரேமசந்திர தெரிவித்துள்ளார்.

ஹிருணிக்காவின் முறைப்பாடு தொடர்பில் விசாரணை மேற்கொள்ள நீதவான் பணிப்பு

கொல்லப்பட்ட முன்னாள் நாடாளுமன்ற உறுப்பினர் பாரத லக்ஷ்மன் பிரேமச்சந்திரவின் மகள் ஹிருணிக்கா பிரேமச்சந்திர செய்துள்ள கொலை அச்சுறுத்தல் முறைப்பாடு தொடர்பில் விசாரணை மேற்கொள்ளுமாறு பொலிஸ் மா அதிபர் என்.கே.இலங்கக்கோனுக்கு கொழும்பு பிரதான நீதவான் பிரசன்ன அல்விஸ் பணித்துள்ளார்.

நாடாளுமன்ற உறுப்பினர் பாரத லக்ஷ்மன் பிரேமச்சந்திரவின் கொலை தொடர்பான வழக்கு விசாரணை இன்று செவ்வாய்க்கிழமை நீதிமன்றத்தில் நடைபெற்றபோது, ஹிருணிக்கா பிரேமச்சந்திரவுக்கு விடுக்கப்பட்ட கொலை அச்சுறுத்தல் பற்றி  பிரதான நீதவானுக்கு பாதிக்கப்பட்ட தரப்பு  சட்டத்தரணிகள் தெரியப்படுத்தினர். இந்த நிலையிலேயே ஹிருணிக்கா பிரேமச்சந்திரவின் கொலை அச்சுறுத்தல் முறைப்பாடு தொடர்பான விசாரணையை மேற்கொள்ளுமாறு பொலிஸ் மா அதிபருக்கு பிரதான நீதவான் பணித்துள்ளார்.

இம்முறைப்பாடு தொடர்பான விசாரணை அறிக்கையை நீதிமன்றத்தில் எதிர்வரும் மே மாதம் 8ஆம் திகதி சமர்ப்பிக்குமாறும் பொலிஸ் மா அதிபருக்கு நீதவான் உத்தரவிட்டார்.