International
Notification
Notification
Submit Cancel

அதிகரித்துவரும் படையினரின் அட்டகாசம்! அச்சத்தில் மூழ்கியுள்ள முல்லைத்தீவு மக்கள்

முல்லைத்தீவு மாவட்டம் - சறாட்டிகுளம் கிராமத்தில், ஆண் துணையில்லாத வீடுகளில் இராணுவத்தினரின் தொல்லை அதிகரித்திருப்பதாக சுட்டிக்காட்டியுள்ள பிரதேச மக்கள் நேற்றிரவும் சம்பவமொன்று இடம்பெற்றுள்ளதாக தெரிவித்துள்ளனர்.

பாண்டியன்குளம், நெட்டாங்கண்டல் பிரதேசங்களிலிருந்து 6 கிலோமீற்றர் காட்டுப் பகுதிக்கு அப்பாலுள்ள இந்தக் கிராமத்தில், சுமார் 70 குடும்பங்கள் வரை மீள்குடியேறி வாழ்ந்து வருகின்றனர்.

அடிப்படை வசதிகள் மற்றும் வெளித்தொடர்புகள் அதிகமில்லாத இந்தக் கிராமத்தில், அண்மைக்காலமாக இவ்வாறான சம்பவங்கள் அதிகமாக இடம்பெற்று வருவதாக சுட்டிக்காட்டப்பட்டுகின்றது.

நேற்றிரவும் இக்கிராமத்திலுள்ள இளம் விதவைப் பெண்ணொருவரின் குடிசைக்குள் சீருடையுடன் சிப்பாயொருவர் புகுந்துள்ளார். இதனை அவதானித்த குறித்த பெண் கூச்சலிட்டுள்ளார்.

இதனையடுத்து, எரிந்து கொண்டிருந்த விளக்கை தூக்கி எறிந்துவிட்டு, சிப்பாய் காட்டுப்பக்கம் ஓடிச்சென்று மறைந்துள்ளார்.

இந்தச் சம்பவம் குறித்து பலதடவை பொலிஸாருக்கும், இராணுவத்தின் தலைமை அதிகாரிக்கும் தெரியப்படுத்திபோதும், இதுவரை ஆக்கபூர்வமான நடவடிக்கைகள் எவையும் எடுக்கப்படவில்லை என அப்பிரதேச மக்கள் தெரிவித்துள்ளனர்.

இவ்வாறான சம்பவங்களினால், இரவு வேளைகளில் மிகவும் அச்சத்துடனே வாழவேண்டியுள்ளதாக அப்பிரதேச மக்கள் கவலை வெளியிட்டுள்ளனர்.