இந்த மேலதிக வகுப்புக்களிற்கு சகல மாணவர்களும் சமூகமளிக்க வேண்டும் எனவும் சமூகமளிக்காதவர்களிற்கு நடவடிக்கை எடுக்கப்படும் எனவும் கல்லூரி அதிபரினால் அறிவுறுத்தப்பட்டுள்ளது.

இவ்வாறான இரவு நேர வகுப்புக்கள் நடாத்தப்படுவது தற்போது குடாநாட்டில் நிலவும் சூழ்நிலைக்கு ஏற்றதொன்றல்ல. குடாநாட்டில் தற்போது கலாசார சீரழிவுகள் மிகவும் மலிந்து காணப்படுகின்றது.

மதுபாவனை, பாலியல் வன்புணர்வுகள், இளவயது கர்ப்பம், சட்டவிரோத கருக்கலைப்புக்கள் என்பன நாளாந்தம் அதிகரித்துக் கொண்டு செல்கின்றது. சுகாதார வைத்தியத் துறையின் தகவல்படி அண்மைக்காலத்தில் இளவயது கர்ப்பம்,கருக்கலைப்புக்கள் என்பன பாடசாலை மாணவியரையே அதிகளவில் தாக்கியுள்ளது.

எனவே இரவு நேர வகுப்புக்கள் நடாத்தப்படுவது இவ்வாறான சம்பவங்கள் மேலும் நடைபெறுவதற்கு வழிகோலுவதாக அமையும்.

மாணவிகள் மட்டுமல்ல மாணவர்களும் தவறான பாதையில் செல்வதற்கு இவை அடித்தளமிடுகின்றன. யாழ் குடாநாட்டுப் பெற்றோராகிய நாம் கல்விக்கு முன்னுரிமை கொடுக்கின்றோம். ஆனால் எமது பிள்ளைகளின் வாழ்க்கை, எதிர்காலம் என்பன அதை விட முக்கியம்.

பிள்ளைகளை அனுப்பிவிட்டு நாம் ஏக்கத்துடன் இருக்க வேண்டியுள்ளது. இரவு நேரத்தில் பெற்றோர் வீதிகளில் காத்திருக்க வேண்டியுள்ளது. எல்லா பெற்றோருக்கும் பிள்ளைகளை கூட்டிச் சென்று அழைத்து வரக்கூடிய வசதிகள் இல்லை. தூர இடங்களில் இருந்து வரும் மாணவர்கள் இதனால் மிகவும் பாதிக்கப்படுகின்றார்கள்.

யாழ். மாநகர முதல்வர் அண்மையில் தனியார் கல்வி நிலையங்களில் மாலை 5.30 மணிக்குப் பின்னர் வகுப்புக்கள் நடாத்தப்படக் கூடாது என அறிவுறுத்திய நிலையில் பாடசாலைகளில் இரவு நேர வகுப்புக்கள் நடாத்துவது பொருத்தமானதா?

மாணவர்களின் நன்மை கருதியே முதல்வர் இந்த முடிவை எடுத்தார். தனியார் கல்வி நிலையத்திற்கு ஒரு நீதி. பாடசாலைக்கு வேறொரு நீதியா? எல்லாம் எமது பிள்ளைகளே. எனவே
பாடசாலையிலும் இரவு நேர வகுப்புக்கள் நடாத்தப்படக் கூடாது.

அண்மையில் பிரதேச செயலர் ஒருவர் மாலை 5.30 மணிக்கு பின்னர் வகுப்புக்கள் நடாத்தும் கல்வி நிலையங்களிற்கு எதிராக சட்ட நடவடிக்கை எடுக்கப்படும் எனக் கூறியுள்ளார்.

பாடசாலைகளில் மேலதிக வகுப்புக்கள் வைப்பது வரவேற்கத்தக்க விடயம். ஆனால் இரவு நேரத்தில் வைப்பது பொருத்தமற்றது.

எனவே மாணவர்களின் நலன் கருதி இரவு நேர வகுப்புக்கள் நடைபெறுவதை நிறுத்தி எமக்கு உதவுமாறு தங்களைத் தாழ்மையுடன் கேட்டுக் கொள்கின்றோம்.

பிரதேச செயலர் மற்றும் கல்வி அதிகாரிகளும் இவ்விடயத்தை கவனத்தில் கொண்டு இரவு நேர வகுப்புக்களை நிறுத்தி எமக்கு உதவ வேண்டும். இவ்வாறு பெற்றோர் கவலை தெரிவித்துள்ளனர்.