பட்டதாரிகள் தலையில் மற்றுமொரு இடி

அரச நிர்வாக உள்நாட்டலுவல்கள் அமைச்சால் அனுப்பி வைக்கப்பட்டுள்ள சுற்று நிரூபத்தில், 2010, 2011 ஆம் ஆண்டு பட்டதாரிகளைப் பயிற்சி பட்டதாரிகள் பதவிக்கு இணைத்துக் கொள்வது கைவிடப்பட்டுள்ளதாகத் தெரிவிக்கப்பட்டுள்ளமையால் அவ்வருடம் பட்டம் பெற்ற பல பட்டதாரிகளுக்கு அநீதி இழைக்கப்பட்டுள்ளதாக வேலையற்ற பட்டதாரிகள் சங்கம் தெரிவித்துள்ளது.

இது தொடர்பில் வேலையற்ற பட்டதாரிகள் சங்கம், அரச நிர்வாக அமைச்சுக்கு கடிதம் ஒன்றை அனுப்பி வைத்துள்ளது.

அக்கடிதத்தில் குறிப்பிடப்பட்டுள்ளதாவது,

இம்மாதம் 4 ஆம் திகதி அரச நிர்வாக உள்நாட்டலுவல்கள் அமைச்சால் அனைத்து மாவட்ட செயலகங்களுக்கும் அனுப்பி வைத்த கடிதத்தில் 2010, 2011ம் ஆண்டு பட்டதாரிகளை பயிற்சி பட்டதாரிகள் பதவிக்கு இணைத்துக் கொள்வது கைவிடப்பட்டுள்ளதாக தெரிவிக்கப்பட்டுள்ளதால் பட்டதாரிகளுக்கு அநியாயம் இழைக்கப்பட்டுள்ளது.

பட்டதாரிகளுக்கு வேலை வழங்க உங்கள் அமைச்சு எடுத்த நடவடிக்கை வரவேற்கத்தக்கது. ஆனால் இதில் ஏற்பட்ட குளறுபடிகளை நாம் அடிக்கடி சுட்டிக்காட்டி விமர்சனம் செய்திருந்தோம்.

அமைச்சு 4 ஆம் திகதி அனுப்பிய கடிதத்தால் 3000 பட்டதாரிகள் பாதிக்கப்பட்டுள்ளனர். நேர்முகப் பரீட்சைகளுக்குச் சென்றுள்ளனர். சிலர் நியமனத்திற்காக்க் கையொப்பம் இட்டுள்ளனர்.

இதனால் பாரிய சிக்கல் ஏற்பட்டுள்ளது. தன்னுடன் பட்டம் பெற்ற சிலர் வேலைக்குச் செல்வதால் சிலர் கவலையடைந்துள்ளனர். அனைத்து தகுதிகளும் உள்ளபோது இவ்வாறு செய்வதை ஏற்றுக் கொள்ள முடியாது.

இந்த விடயம் தொடர்பில் நீங்கள் உடனடி கவனம் செலுத்தி குறித்த பட்டதாரிகளுக்கு வேலை வழங்க வேண்டும் என கேட்டுக் கொள்வதாக அக்கடிதத்தில் தெரிவிக்கப்பட்டுள்ளது.

advertisement