பிரித்தானியாவில் 1984ம் ஆண்டில் தமிழ்த் தேசியச் செயற்பாட்டாளராகப் பணி செய்ய ஆரம்பித்த திரு. இராசையா நவநாயகம் அவர்கள் 1985ம் ஆண்டிலிருந்து 1992ம் ஆண்டு வரை பிரித்தானியத் தமிழர் ஒருங்கிணைப்புக்குழுவின் நிகழ்ச்சி ஒருங்கிணைப்பாளராக இருந்தார்.

தனது பணிக்காலத்தில் 1990ம் ஆண்டு பிரித்தானியாவில் முதன்முதலாக மாவீரர் நாள் நிகழ்வை ஒழுங்குபடுத்தி உணர்வெழுச்சியுடன் அதை நடாத்துவித்தார்.

தமிழர் புனர்வாழ்வுக்கழகம் 1986ம் ஆண்டு பிரித்தானியாவில் தொடங்கப்பட்ட காலத்திலிருந்து 1992ஆம் ஆண்டு வரை அதன் பொறுப்பாளராக இருந்து அதன் பணிகளை மேம்படுத்தக் கடுமையாக உழைத்தார்.

திரு. இராசையா நவநாயகம் அவர்கள் 1986ல் வோல்தம்ஸ்ரோ தமிழ்ச்சங்கத்தை ஆரம்பித்தவர்களில் ஒருவராவார்.

வோல்தம்ஸ்ரோ தமிழ்ச்சங்கத்தில் தலைவர் உட்படப் பல்வேறு பொறுப்புக்களை ஏற்று அதன் வளர்ச்சிக்காக உழைத்த இவரை வோல்தம்ஸ்ரோ தமிழ்ச்சங்கம் தனது வெள்ளிவிழாவின் போது “வோல்தம்ஸ்ரோ தமிழ் மக்களின் தந்தை” என்று மதிப்பளித்துச் சிறப்பித்தது.

இவர் தமிழ் அகதிகள் நடவடிக்கைக் குழுவில் ஒரு பணியாளனாகப் பல்லாண்டு காலம் சேவை மனப்பாங்குடன் பணி செய்தார்.

தன் குடும்பத்தை விடவும் தான் பிறந்த இனத்துக்காகவே தன் வாழ்நாளைச் செலவிட்டவரும் தமிழ்த் தேசியத்தையும் தேசியத்தலைவர் அவர்களையும் விழிமூடும் வரை பெருவிருப்போடு நேசித்த ஒரு சமூகசேவையாளனாகத் தமிழ்த் தேசியப் பணியில் அயராது உழைத்தவருமான திரு.இராசையா நவநாயகம் அவர்களுக்கு “நாட்டுப்பற்றாளர்” என மதிப்பளிப்பதில் நாம் பெருமை கொள்கின்றோம்.

“புலிகளின் தாகம் தமிழீழத் தாயகம்”