நாகை, இராமேஸ்வரம், வேதாரண்யம் பகுதி மீனவர்கள் மீது இலங்கை கடற்படையினர் அடிக்கடி தாக்குதல் நடத்தி வருகின்றனர். மேலும் மீனவர்களையும் சிறை பிடித்து செல்கிறார்க்ள.

கடந்த சில நாட்களுக்கு முன்பு நாகை மீனவர்கள் சிறை பிடிக்கப்பட்டு இலங்கை அழைத்து செல்லப்பட்டனர். நேற்று முன்தினம் தான் அவர்கள் விடுதலை செய்யப்பட்டனர்.

இந்த நிலையில் நாகை மீனவர்களை இலங்கை கடற்படையினர் தாக்கி மீன்களை பறித்து சென்ற சம்பவம் மீண்டும் நடைபெற்றுள்ளது.

நாகை மாவட்டம் வேதாரண்யம் அருகே உள்ள கோடியக்கரை பகுதியில் நாகை, வேதாரண்யம், இராமேஸ்வரம் காரைக்கால் மற்றும் பல்வேறு மாவட்டங்களை சேர்ந்த மீனவர்கள் தங்கி மீன்பிடித்து வருகிறார்கள்.

இவர்கள் கோடியக்கரையில் இருந்து 70 விசைப் படகுகளில் மீனவர்கள் மீன்பிடிக்கச் சென்றனர்.

இவர்களோடு நாகை மாவட்டம் தரங்கம்பாடி அருகே உள்ள புதுப்பேட்டையைச் சேர்ந்த விஜயபாலன் (வயது32), நடராஜன் (50), கண்ணையன் (28), குருசாமி (30), சங்கர் (30), குப்புசாமி (59), சிலம்பரசன் (24), தேவராஜன் (50) ஆகிய 8 மீனவர்களும் 2 விசைப் படகுகளில் மீன்பிடிக்க சென்றனர். அவர்கள் 8 பேரும் மீன்பிடித்து விட்டு தங்கள் படகுகளில் கரை திரும்பிக்கொண்டிருந்தனர்.

அப்போது அங்கு ரோந்து கப்பலில் வந்த இலங்கை கடற்படையினர் புதுப்பேட்டை மீனவர்களின் படகுகளை சுற்றி வளைத்தனர். பின்னர் விசைப்படகுகளில் அத்துமீறி நுழைந்த இலங்கை கடற்படையினர் மீனவர்களை கயிற்றால் தாக்கினர்.

பின்னர் இங்கு ஏன் வந்தீர்கள் என்று கேட்டு மிரட்டி, புதுப்பேட்டை மீனவர்கள் பிடித்து வைத்திருந்த விலை உயர்ந்த நீலக்கால் நண்டுகள், மீன்களையும் பறித்துக் கொண்டு மீனவர்களை விரட்டி அடித்தனர்.

இதைத்தொடர்ந்து கோடியக்கரை திரும்பிய 8 மீனவர்களும், இலங்கை கடற்படையினரின் தாக்குதல் குறித்து மீன்வளத்துறை அதிகாரிகளுக்கும், கடலோர பாதுகாப்பு பொலிஸாருக்கும் தகவல் தெரிவித்தனர்.

இதன்பேரில் அதிகாரிகள் மற்றும் பொலிஸார் விசாரணை நடத்தி வருகிறார்கள். நாகை மீனவர்கள் மீது இலங்கை கடற்படை தாக்குதல் சம்பவத்திற்கு முற்றுப்புள்ளி வைக்க வேண்டும் என மீனவர்கள் வேண்டுகோள் விடுத்துள்ளனர்.