வடக்கு கிழக்கிலிருந்து வெளியேறிய மூவின மக்களை மீள்குடியேற்ற நடவடிக்கை எடுக்கப்பட வேண்டும்!- முஸம்மில்

வடக்கு கிழக்கிலிருந்து வெளியேறிய சிங்கள, தமிழ் மற்றும் முஸ்லிம் ஆகிய மூவின மக்களையும் மீள்குடியேற்ற நடவடிக்கை எடுக்கப்பட வேண்டுமென தேசிய சுதந்திர முன்னணியின் பேச்சாளர் முஹமட் முஸம்மில் தெரிவித்துள்ளார்.

போர் இடம்பெற்ற காலத்தில் தமிழீழ விடுதலைப் புலிகளினால் விரட்டியடிக்கப்பட்ட சிங்கள, தமிழ் மற்றும் முஸ்லிம் மக்கள் சொந்த இடங்களில் மீள்குடியேற்றப்பட வேண்டும்.

1990ம் ஆண்டில் புலிகளினால் விரட்டியடிக்கப்பட்ட முஸ்லிம் மக்களின் வர்த்தக நிலையங்கள் மீள அவர்களிடம் ஒப்படைக்கப்பட வேண்டுமென அமைச்சர் டக்ளஸ் தேவானந்தா தெரிவித்துள்ளார்.

இந்த கருத்து வரவேற்கப்பட வேண்டியது, அதற்காக அவருக்கு நன்றி தெரிவிக்கின்றோம்.

முஸ்லிம் மக்கள் மட்டுமன்றி; சிங்கள மற்றும் புலி எதிர்ப்பு தமிழர்களும் போர் இடம்பெற்ற காலத்தில் உடமைகளை இழந்து விரட்டியடிக்கப்பட்டனர்.

இவ்வாறானவர்களுக்கும் தங்களது உடமைகளை வழங்க நடவடிக்கை எடுக்கப்பட வேண்டும்.

பயங்கரவாதம் காரணமாக இருப்பிடங்களை இழந்த அனைவரும் சொந்த இடங்களில் மீள்குடியேற்றப்பட வேண்டுமென தேசிய சுதந்திர முன்னணி, கோரிக்கை விடுத்துள்ளது.

அமைச்சர் டக்ளஸ் தேவானந்தாவிற்கு அனுப்பி வைத்துள்ள விசேட கடிதத்தில் இந்த கோரிக்கை விடுக்கப்பட்டுள்ளது.

2ம் இணைப்பு

மீள்குடியேற்றத்துக்கு அமைச்சர் தேவாநந்தா ஏற்பாடுகளை செய்யவேண்டும்!-  தேசிய சுதந்திர முன்னணி கோரிக்கை

வடக்கிலும் கிழக்கிலும் இருந்து இடம்பெயர்ந்த தமிழ் சிங்கள முஸ்லிம மக்களை மீண்டும் சொந்த இடங்களில் மீள்குடியேற்ற நடவடிக்கையை எடுக்கவேண்டும் என்று தேசிய சுதந்திர முன்னணி அமைச்சர் டக்ளஸ் தேவாநந்தாவிடம் கோரியுள்ளது.

அந்த முன்னணியின் பேச்சாளர் மொஹமட் முஸம்மில், இந்தக்கோரிக்கையை விடுத்துள்ளார்.

போருக்கு பின்னர் தமது இருப்பிடங்களுக்கு திரும்ப எவருக்கும் இடைத்தரகர் தேவையில்லை என்று அண்மையில் அமைச்சர் டக்ளஸ் தேவாநந்தா கூறியிருந்தமைக்கு பதிலளிக்கும் முகமாகவே முஸம்மில் இந்தக்கோரிக்கையை விடுத்துள்ளார்.

வடக்குகிழக்கில் இருந்து இடம்பெயர்ந்த அனைத்து மக்களுக்கும் மீண்டும் சொந்த இடங்களுக்கு செல்ல வழிகள் ஏற்படுத்திக் கொடுக்கப்பட வேண்டும்.

அதற்கு அமைச்சர் தேவாநந்தா ஆவன செய்யவேண்டும் என்று முஸம்மில் கோரியுள்ளார்.