நீதித்துறைக்கும் பாராளுமன்றத்துக்கும் இடையில் முறுகல் - விரைவில் நீங்கும் என்கிறார் கெஹலிய

பிரதம நீதியரசரை விசாரிப்பதற்கான சட்ட அதிகாரம் பாராளுமன்றத் தெரிவுக் குழுவுக்கு இல்லை என்ற உயர் நீதிமன்றத்தின் வியாக்கியானம் தொடர்பில் பாராளுமன்றம் பதிலளிக்கவுள்ளது.

உயர் நீதிமன்றத்தின் வியாக்கியானம் தொடர்பில் பாராளுமன்றத்தின் நிலைப்பாட்டை எதிர்வரும் எட்டாம் திகதி சபாநாயகர் சமல் ராஜபக்ஷ அறிவிப்பார். அதுவரை நாங்கள் எதுவும் கூற முடியாது என்று அமைச்சரவை பேச்சாளரும் அமைச்சருமான கெஹெலிய ரம்புக்வெல தெரிவித்தார்.

வாராந்த அமைச்சரவை முடிவுகளை அறிவிக்கும் ஊடகவியலாளர் மாநாட்டின் போதே அமைச்சர் இவ்வாறு தெரிவித்துள்ளார்.

இதுவரை காலமும் பதவி விலக்குவது தொடர்பில் ஒரு முறைமை பின்பற்றப்பட்டு வந்தது. அந்த முறைமை குறித்து தற்போது புதிய விளக்கம் அளிக்கப்பட்டுள்ளது. எனவே அது தொடர்பில் ஆராய வேண்டியுள்ளது.

சிலவேளை எட்டாம் திகதிக்கு முன்னரே பாராளுமன்றம் அவசரமாக கூடக்கூடிய சாத்தியம் உள்ளது என்றும் அமைச்சர் குறிப்பிட்டார்.

மேலும் தற்போதைய நிலைமைகளை பார்க்கும் போது நீதித்துறைக்கும் சட்டவாக்க நிறுவனமான பாராளுமன்றத்துக்கும் இடையில் ஒரு அளவில் முறுகல் நிலை உள்ளது என்பதனை என்னால் மறுக்க முடியாது. ஆனால் இது தற்காலிகமாக மற்றும் இறுதியான சிக்கல் நிலையாக அமையலாம் என்றும் அவர் குறிப்பிட்டார்.

advertisement