சுவிற்ஸர்லாந்தின் தலைநகர் சூரிச்சில் நடைபெற்று வரும் தமிழ், முஸ்லிம் கட்சிகளின் தலைவர்களின் கூட்ட முடிவுகள் தொடர்பான கூட்டறிக்கை இன்று ஞாயிற்றுக்கிழமை வெளியாகும் என்று தெரிவிக்கப்பட்டுள்ளது.

இலங்கையில் பல்வேறு பிரச்சினைகள் குறித்து பொது இணக்கப்பாட்டை எட்டும் முயற்சியில் சிறுபான்மைக் கட்சிகளுக் கிடையில் நடைபெற்றுவரும் கூட்டத்தின் இறுதி முடிவுகள் இன்று ஞாயிற்றுக் கிழமை அறிவிக்கப்படும் என்று ஈ.பி.டி.பி யின் செயலாளர் நாயகமும் அமைச்சருமான டக்ளஸ் தேவானந்தா தெரிவிக்கிறார்.

பொது இணக்கப்பாடு குறித்த தீர்மானங்களை தற்போது தம்மால் வெளியிட முடியாது எனவும் அவர் தமிழோசைக்குத் தெரிவித்தார்.

பொதுவாக சுமுகமான முறையில் கலந்துரையாடல்கள் நடைபெறுகின்ற போதிலும் சில விடயங்கள் தொடர்பில் காரசாரமான விவாதங்கள் இடம்பெற்றதாகவும் அவர் குறிப்பிட்டார்.

இந்தக் கூட்டத்தில் தமிழ் தேசிய கூட்டமைப்பின் சம்பந்தர், அமைச்சர் டக்ளஸ் தேவானந்தா, கிழக்கு மாகாண முதல்வர் சிவநேசதுரை சந்திரகாந்தன், ஸ்ரீலங்கா முஸ்லீம் காங்கிஸ் கட்சியின் தலைவர் ரவூப் ஹக்கிம் மற்றும் மலையக அரசியல் தலைவர்கள் உள்ளிட்ட பலர் கலந்து கொண்டுள்ளனர்.