கிளிநொச்சியில் காணியற்றவர்களிடமிருந்தும் பொருத்து வீட்டுக்கு விண்ணப்பங்கள் பெறப்படுகின்றன

Report Print Suman Suman in சமூகம்

கிளிநொச்சி மாவட்டத்தில் காணியற்றவர்களிடமிருந்தும் பொருத்து வீட்டுக்கான விண்ணப்பங்கள் பெறப்பட்டுள்ளதாக பொது அமைப்புகள் குற்றம் சாட்டியுள்ளன.

பொருத்து வீடுகள் முற்றிலும் பொருத்தமற்றது என வடக்கில் பலராலும் எதிர்ப்புத் தெரிவிக்கப்பட்டு வரும் நிலையில் மீள்குடியேற்ற அமைச்சு மாவட்ட செயலகம், பிரதேச செயலகங்கள் ஊடாக பொருத்து வீட்டுக்கு விருப்பம் கோருபவர்களிடமிருந்து விண்ணப்பங்களை பெற்று வருகிறது.

அந்த வகையில் கிளி நொச்சி மாவட்டத்தில் காணியற்றவா்கள், ஒரு அங்கத்தவா் குடும்பங்கள், கிளிநொச்சியில் காணிகள் இருந்தும் நிரந்தரமாக மாவட்டத்தில் வசிக்காதவர்கள் என அனைத்து தரப்பினர்களிடமிருந்தும் பொருத்து வீட்டுக்கான விண்ணப்பங்கள் பெறப்பட்டுள்ளன.

பொருத்து வீடுகளுக்கு மக்கள் பெரும் தொகையில் விண்ணப்பித்துள்ளனர். எனவே அது மக்களின் விருப்பத்திற்குரிய வீடு எனக் காட்டுவதற்கே மீள்குடியேற்ற அமைச்சு இவ்வாறு நடவடிக்கைகளை மேற்கொண்டுள்ளது என மாவட்ட பொது அமைப்புக்கள் விசனம் தெரிவித்துள்ளன.

கிளிநொச்சி மாவட்டத்திற்கு மீள்குடியேற்ற அமைச்சினால் 11 ஆயிரம் பொருத்து வீட்டு விண்ணப்படிவங்கள் அனுப்பி வைக்கப்பட்டிருந்தன.

இவற்றுள் கரைச்சி பிரதேச செயலக பிரிவுக்கு 6500 விண்ணப்பங்களும், கண்டாவளை பிரதேச செயலக பிரிவுக்கு 2300 விணப்பங்களும், பூநகரி பிரதேச செயலக பிரிவுக்கு 1500 விண்ணப்பங்களும், பளை பிரதேச செயலக பிரிவுக்கு 700 விண்ணப்பங்கள் என வழங்கியுள்ளது..

இதனை தவிர மீள்குடியேற்ற அமைச்சு அரச திணைக்களங்களுக்கு அப்பாலும் பொருத்து வீட்டுக்கான விண்ணப்பங்களை வழங்கி விதிமுறைகள், நடைமுறைகள் எவற்றையும் பின்பற்றாது அவற்றை மீளவும் பெற்றுவருவதாகவும் தெரிவிக்கப்பட்டுள்ளது.

எனவே பொருத்தமற்ற பொருத்து வீடுகளுக்கு மக்களிடமிருந்து அதிக வரவேற்பு கிடைத்துள்ளது என வெளிக்காட்டவே அமைச்சு இவ்வாறு பல நடவடிக்களை மேற்கொண்டுள்ளது என பொது அமைப்புகள் குற்றம் சாட்டியுள்ளன.

மேலும் மக்களுக்கு இதனை விட மேலும் ஒரு வாய்ப்பு கிடைக்காது என்பதனால் விருப்பம் இன்றி விண்ணப்பங்களை பூரணப்படுத்தி வழங்கி வருவதாகவும் சில அதிகாரிகள் குறிப்பிடுகின்றனர்.

Comments