நல்லாட்சியில் கல்வித்துறைக்கு மிகக் கூடுதலாக செலவிடப்படுகின்றது

Report Print Rusath in சமூகம்

ஜனாதிபதியும், பிரதம மந்திரியும், இணைந்து நடத்துகின்றஇந்த ஆட்சியிலே கல்வித்துறைக்கு மிகக் கூடுதலாக செலவிடுகின்றார்கள்.

அந்த வகையில் தேசிய ஒருமைப்பாடு மற்றும் சமூக நல்லிணக்க அமைச்சிலிருக்கின்ற அமைச்சர் மனோகணேசன், மற்றும் தற்போது அந்த அமைச்சில் புதிதாக பிரதி அமைச்சராக பதவி ஏற்றிருக்கின்ற எமது மாவட்டத்தைச் சேர்ந்த அலிசாஹிர் மௌலான, அமைச்சின் செயலாளர் சிவஞானசோதி, உள்ளிட்ட பலரும் எமது மாவட்டம் சார்பாக எமக்கு பல்வேறு உதவிகளைச் செய்து வருகின்றார்கள் என மட்டக்களப்பு மாவட்ட அரசாங்க அதிபர் மாணிக்கம் உதயகுமார் தெரிவித்துள்ளார்.

மட்டக்களப்பு பட்டிருப்பு களுதாவளை மாகாவித்தியாலயத்தில் நிர்மாணிக்கப்படவுள்ள 3 மாடிக் கட்டடத்திற்கான அடிக்கல் நடும் நிகழ்வு இன்று பகல் இடம்பெற்றுள்ளது.

குறித்த நிகழ்வில் கலந்து கொண்டு உரையாற்றும் போதே இவ்வாறு கூறியுள்ளார்.

தொடர்ந்தும் அவர் கருத்து தெரிவிக்கையில்,

தேசிய ஒருமைப்பாடு மற்றும் சமூக நல்லிணக்க அமைச்சின் 38 மில்லியன் ரூபா ஒதுக்கீட்டில் 3 மாடிகளைக் கொண்டு இப்பாடசாலைக் கட்டடம் அமையப் பெறவுள்ளது.

இதில் முதற்கட்டமாக 2 மாடிகளை அமைப்பதற்கு இந்த ஆண்டு 26 மில்லியன் ஒதுக்கீடு செய்யப்பட்டுள்ளது.

இவற்றுக்கு மேலாக இந்த அமைச்சினால் களுதாவளைக் கிராமத்திற்கு 15 மில்லியன் ரூபா ஒதுக்கீட்டில் ஒரு வீதியும், 10 மில்லியன் ரூபா ஒதுக்கீட்டில் மற்றுமொரு வீதியுமாக 2 வீதிகள் புணரமைப்புச் செய்வதற்கும் அனுமதிக்கப்பட்டுள்ளன.

எனவே இந்த வருடம் களுதாவளைக் கிராமம் தேசிய ஒருமைப்பாடு மற்றும் சமூக நல்லிணக்க அமைச்சிலிருந்து 51 மில்லியன் ரூபாவைப் பெற்றுக் கொள்ளவுள்ளது.

இவ்வாறான வேலைத் திட்டங்களால் அரசாங்கம் எதிர்பார்ப்பது என்னவெனில் இங்கு கல்வி கற்கின்ற மாணவர்கள் எதிர்காலத்தில் சிறந்த தலைவர்களாக திகழ்ந்து இந்த சமூகத்தை வழி நடத்துகின்றவர்களாக மாற வேண்டும் என்பதைத்தான்.

எதுவித கெட்ட பழக்கங்களுக்கும் அடிமையில்லாத மாணவர் சமூதாயமாக, எதிர்காலத்தில் சிறந்த மனிதர்களாக திகழ வேண்டும் என்பதையும் அரசாங்கம் எதிர்பார்க்கின்றது.

எனவே மாணவர்கள் சிறந்த பெறுபேறுகளைப் பெறுவதுடன், நாட்டிற்கு நல்ல பிரஜைகளாகத் திகழ வேண்டும்.

அரசாங்கம் இவ்வாறு பௌதீக வழங்களைச் செய்யும். அவற்றைப் பயன்படுத்தி முன்னேற வேண்டியது எமது கைகளிலே தங்கியுள்ளது.

இந்தப் பாடசாலையில் சுமார் 1500 மாணவர்கள் கல்வி கற்றாலும் நாளாந்தம் சுமார் 5 வீதமான மணாவர்கள் பாடசாலைக்குச் சமூகம் கொடுக்காமலிருப்பது சுட்டிக்காட்டப்பட்டுள்ளது.

இது ஒரு வேதனைக்குரிய விடையம். அரசாங்கத்தைப் பொறுத்தவரையில், ஒன்று தொடக்கம் 13 ஆம் ஆண்டு வரை மாணவர்களுக்கு இலவசக் கட்டாயக் கல்வியை அறிமுகப்படுத்தியுள்ளதை நாம் அனைவரும் அறிவோம்.

நாளாந்தம் மாணவர்கள் பாடசாலைக்குச் சமூகம் கொடுத்து கல்வியைப் பெற்றுக் கொள்ள வேண்டும்.

அரசாங்கம் கல்விக்கு எவ்வளவுதான் செலவீடுகளைச் செய்தாலும் மாணவர்களின் கல்வியைத் தீர்மானிக்கின்ற இடங்காக பிரத்தியேக கல்வி நிலையங்கள் காணப்படுவதையிட்டு மனவேதனை அடையக்கூடியதாகவுள்ளது.

மாணவர்களுக்கு மாடிக்கட்டடங்கள், கதிரை மேசைகள் உள்ளிட்ட பல உதவிகள் வழங்கப்படுகின்ற போதும், பிரத்தியேக வகுப்புக்களில் ஓலைக் கொட்டில்களில், முறையான இருக்கைகளின்றி மாணவர்கள் கல்விக்காக வாழ்க்கைகைக் கழிக்கும் நிலையை நாம் மாற்றியமைக்க வேண்டும் என குறிப்பிட்டுள்ளார்.

இந்த நிகழ்வில் வித்தியாலய அதிபர் பி.காப்தீபன் தலைமையில் நடைபெற்ற நிகழ்வில் பட்டிருப்புக் வலயக் கல்விப் பணிப்பாளர் ஆர்.சுகிர்தராஜன், மாவட்ட திட்டமிடல் பணிப்பாளர் ஆர்.நெடுஞ்செழியன், உள்ளிட்ட அரச அதிகாரிகள், கல்வியியலாளர்கள், அதிபர்கள், ஆசிரியர்கள், மாணவர்கள், பெற்றோர்கள், கிராம மட்ட பொது அமைப்புக்களின் பிரதிநிதிகள், பழையமாணவரகள் என பலரும் கலந்து கொண்டுள்ளனர்.