மலையக தோட்டத் தொழிலாளர்களின் சம்பளம் தொடர்பாக போராட்டம்

Report Print Kumar in சமூகம்

மலையக தோட்டத்தொழிலாளர்களின் சம்பளத்தினை 1000ரூபாவாக அதிகரிக்க கோரியும் அவர்களின் அடிப்படை பிரச்சினைக்கு தீர்வு வழங்க கோரியும் மட்டக்களப்பில் கவன ஈர்ப்பு போராட்டமும், கையெழுத்து போராட்டமும் முன்னெடுக்கப்பட்டுள்ளது.

குறித்த போராட்டம் இன்று காலை முற்போக்கு தமிழர் அமைப்பின் ஏற்பாட்டில் மட்டக்களப்பு, காந்திபூங்கா முன்றலில் மேற்கொள்ளப்பட்டுள்ளது.

இதன்போது தோட்டத்தொழிலாளர்களின் சம்பள அதிகரிப்பு மற்றும் அவர்களின் அடிப்படை பிரச்சினைகளை தீர்க்குமாறு வலியுறுத்தி கவன ஈர்ப்பு போராட்டம் நடைபெற்றுள்ளது.

இதில் தோட்டத்தொழிலாளர்களுக்கு ஆதரவான வகையில் கோசங்கள் எழுப்பப்பட்டதுடன் துண்டுப்பிரசுரங்களும் விநியோகிக்கப்பட்டுள்ளன.

அதனைத்தொடர்ந்து கையெழுத்துப்பெறும் போராட்டம் முன்னெடுக்கப்பட்டுள்ளது.

மட்டக்களப்பு மாவட்டத்தில் ஆரம்பிக்கப்பட்ட இந்த போராட்டம் கிழக்கு மாகாணத்தின் அனைத்து மாவட்டங்களிலும் முன்னெடுக்கவுள்ளதாக முற்போக்கு தமிழர் அமைப்பின் தலைவரும் மட்டக்களப்பு மாவட்ட நாடாளுமன்ற உறுப்பினருமான எஸ்.வியாழேந்திரன் தெரிவித்துள்ளார்.

இந்த அரசாங்கம் மலையக மக்களை தொடர்ந்து ஏமாற்றி வருவதாகவும் இங்கு அவர் குறிப்பிட்டுள்ளார்.

எதிர்வரும் ஐந்தாம் திகதி வரவு செலவுத்திட்டம் சமர்ப்பிக்கப்படவுள்ள நிலையில் அதில் தோட்டத் தொழிலாளர்களுக்கான தீர்வும் முன்வைக்கப்பட வேண்டும் என இங்கு வலியுறுத்தப்பட்டுள்ளது.

முற்போக்கு தமிழர் அமைப்பின் தலைவரும் மட்டக்களப்பு மாவட்ட நாடாளுமன்ற உறுப்பினருமான எஸ்.வியாழேந்திரன் தலைமையில் முன்னெடுக்கப்பட்ட இந்த போராட்டத்தில் மாநகரசபை, பிரதேச சபை உறுப்பினர்கள், முற்போக்கு தமிழர் அமைப்பின் உறுப்பினர்கள், பொதுமக்கள் என பலர் கலந்துகொண்டிருந்தனர்.