ஓமந்தை புகையிரதக் கடவையின் வீதித் தடையால் மக்கள் அவதி

Report Print Theesan in சமூகம்

வவுனியா ஓமந்தை பன்றிக்கெய்தகுளம் அம்பாள் வீதி புகையிரதக்கடவைக்கு அமைக்கப்பட்ட பாதுகாப்பு வேலியை அகற்றி அவ்வீதியூடான போக்குவரத்தினை அனுமதியற்ற முறையில் அமைக்கப்பட்டுள்ளதாக தெரிவித்து கடந்த 5ஆம் திகதி முதல் வவுனியா புகையிரதத்திணைக்களம் தடை செய்துள்ளது.

இதையடுத்து அப்பகுதியிலுள்ள மக்கள் புகையிரதத்தினை வழிமறித்து போராட்டம் ஒன்றினை மேற்கொள்ளத்திட்டமிட்டிருந்தனர்.

இந்நிலையில் வவுனியா தெற்கு தமிழ் பிரதேச சபை உறுப்பினர் அஞ்சலா கோகிலகுமாருடன் தொடர்புகொண்ட ஓமந்தை பொலிசார் அப்பகுதி மக்களுடனான கலந்துரையாடல் ஒன்றிற்கு அழைப்பு விடுத்திருந்தனர்.

இந்நிலையில் நேற்று மாலை 6மணியளவில் அம்பாள் வீதி புகையிரதக்கடவைக்கு அருகில் இடம்பெற்ற கலந்துரையாடலின் போது ஓமந்தை பொலிஸ் நிலையப் பொறுப்பதிகாரி சுரேஸ் த சில்வா தமிழ் தெற்கு பிரதேச சபை உறுப்பினர், ஆலய நிர்வாகத்தினர் கிராம அபிவிருத்திச்சங்க உறுப்பினர்கள், பொதுமக்கள் எனப்பலரும் கலந்து கொண்டனர்.

இதன்போது கடந்த மாதம் 25ஆம் திகதி இறம்பைக்குளம் ஈஷி மிஷன் ஆலயப்பங்களிப்புடன் ஓமந்தை பன்றிக்கெய்தகுளம் அம்பாள் வீதிக்கு பாதுகாப்பு வேலி அமைக்கப்பட்டிருந்தது.

இந்நிலையில் புகையிரத திணைக்களத்தின் அனுமதி பெற்றிருக்கவில்லை எனத் தெரிவிக்கப்பட்டு அப்பாதுகாப்பு வேலியை அகற்றுமாறு புகையிரத திணைக்களத்தினால் தெரிவிக்கப்பட்டது. இதன் பின்னர் அவ்வீதி தண்டவாளம் இடப்பட்டு மக்கள் போக்குவரத்து மேற்கொள்ளமுடியாமல் தடை ஏற்படுத்தப்பட்டுள்ளது.

இந்நிலையில் அப்பகுதி மக்களால் தமது அத்தியாவசியத் தேவைகளுக்காக அவ்வீதியைப்பயன்படுத்த முடியவில்லை. வைத்தியசாலை, பாடசாலை, விவசாய பயிர்ச் செய்கைகளை குறிப்பாக நெல் அறுவடை செய்யப்பட்டு எடுத்துவரமுடியவில்லை.

மரக்கறிகளை சந்தைக்கு எடுத்துவரமுடியவில்லை என்று தமது குறைகளை பொலிசாரிடம் சுட்டிக்காட்டியிருந்தனர். இதற்கு ஓரிரு தினங்களில் தற்காலிகத்தீர்வு ஒன்றினைப் பெற்றுத்தருவதாக நேற்றைய சந்திப்பில் பொலிசார் தெரிவித்துள்ளனர்.

Latest Offers