ஆட்சிக்கு வந்தால் இலங்கை மீது ஆயுதத் தடை விதிக்கப்படும் - ஜோன் மக்டொனல்!

Report Print Gokulan Gokulan in சமூகம்

முள்ளிவாய்க்கால் தமிழின அழிப்பு நினைவெழுச்சி நாள் நெருங்கும் நிலையில் நேற்று பிரித்தானிய நாடாளுமன்றில் இடம்பெற்ற நினைவு ஒன்றுகூடலில் தமிழர்களுக்கு அனைத்துலக நீதி கிட்டுவதை பிரித்தானியாவின் தொழிற்கட்சித் தலைமை வலியுறுத்தியுள்ளது.

பிரித்தானிய நாடாளுமன்றின் பிரதான கட்டிடத் தொகுதியில் உள்ள பத்தாவது கேட்போர் கூடத்தில், தொழிற்கட்சிக்கு ஆதரவான தமிழர்கள் அமைப்பின் ஏற்பாட்டில், நாடாளுமன்ற உறுப்பினர் சிபோன் மக்டொனா அவர்களின் அனுசரணையில் நேற்று நடைபெற்றுள்ளது.

இதன்போது முள்ளிவாய்க்கால் தமிழின அழிப்பு நினைவு ஒன்றுகூடலில் தொழிற்கட்சித் தலைவர் ஜெரமி கோர்பின் பங்கேற்று உரையாற்றியுள்ளார்.

பத்து ஆண்டுகள் எட்டிய நிலையிலும், தமக்கு இழைக்கப்பட்ட இனவழிப்பிற்கு நீதிகிட்டாத நிலையில் தமிழர்கள் இருப்பதையிட்டு தனது கவலையை வெளியிட்ட ஜெரமி கோர்பின், தமிழர்களுக்கு நீதி கிட்டுவதற்காக தொழிற்கட்சி தொடர்ந்தும் பாடுபடும் என்றும் குறிப்பிட்டுள்ளார்.

குறித்த நினைவு ஒன்றுகூடலில் தொழிற்கட்சியின் உயர்நிலைத் தலைவர்கள் - நிழல் அமைச்சர்கள் உட்பட பல முன்னணி நாடாளுமன்ற உறுப்பினர்கள் கலந்து கொண்டு தமிழர்களுக்காக குரல் கொடுத்துள்ளனர்.

இந்நிலையில் நேற்று முன்தினம் செவ்வாய்க்கிழமை பிரித்தானிய மகாராணியாரின் அதிகாரபூர்வ நிழல் நிதி அமைச்சரும், தொழிற்கட்சியின் இரண்டாம் தலைவருமான ஜோன் மக்டொனல் பிரித்தானியாவில் உள்ள தமிழ் அமைப்புக்கள் மற்றும் ஊடகங்களின் பிரதிநிதிகளை சந்தித்து தொழிற்கட்சியிடம் இருந்து தமிழர்கள் எதிர்ப்பார்க்கும் அரசியல் செயற்பாடுகள் பற்றிக் கேட்டறிந்து கொண்டிருந்தமை குறிப்பிடத்தக்கது.

ஆட்சிக்கு வந்தால் இலங்கை மீது ஆயுதத் தடை விதிக்கப்படும் - தொழிற்கட்சியின் இரண்டாம் நிலைத் தலைவர் ஜோன் மக்டொனல்!

பிரித்தானியாவில் தொழிற்கட்சி ஆட்சிக்கு வரும் பட்சத்தில் இலங்கை அரசுக்கான ஆயுத விற்பனைகள் அனைத்தும் தடை செய்யப்படும் என்று தொழிற்கட்சியின் இரண்டாம் நிலைத் தலைவரும், பிரித்தானிய மகாராணியின் அதிகாரபூர்வ எதிர்கட்சியின் நிழல் நிதித்துறை அமைச்சருமான ஜோன் மக்டொன்ல் (John McDonnell) தெரிவித்துள்ளார்.

நேற்று பிரித்தானிய நாடாளுமன்றத்தில் தொழிற்கட்சிக்கு ஆதரவான தமிழர்கள் அமைப்பின் ஏற்பாட்டில், நாடாளுமன்ற உறுப்பினர் சிபோன் மக்டொனா (Siobhain McDonagh) அவர்களின் அனுசரணையில் இடம்பெற்ற முள்ளிவாய்க்கால் தமிழின அழிப்பு நினைவு ஒன்றுகூடலில் கலந்து கொண்டு உரையாற்றும் பொழுதே அவர் இவ்வாறு தெரிவித்துள்ளார்.

இதன் பிரகாரம் இலங்கை ஆயுதப் படைகளுக்குப் பிரித்தானியாவால் வழங்கப்படும் பயிற்சிகளும் நிறுத்தப்படும் என்றும் அவர் தெரிவித்துள்ளார்.

குறித்த நினைவு ஒன்றுகூடலில் தொழிற்கட்சியின் நிழல் வெளியுறவுத்துறை அமைச்சர் எமிலி தோன்பெரி (Emily Thornberry), நிழல் பன்னாட்டு அபிவிருத்தித்துறை அமைச்சர் பிறீற் ஜில் (Preet Gill), நிழல் வெளியுறவுத்துறை இணை அமைச்சர் லிஸ் மக்இனெஸ் (Liz McInnes) மற்றும் நாடாளுமன்ற உறுப்பினர்களான விரேந்திர சர்மா (Virendra Sharma), ஸ்டீபன் ரிம்ஸ் (Stephen Timms), லூக் பொலார்ட் (Luke Pollard), ஸ்ரெலா கிறீசி (Stella Creasy), கரன் லீ (Karen Lee), வெஸ் ஸ்ரிறீற்ரிங்க் (Wes Streeting), கரத் தொமஸ் (Gareth Thomas), சாரா சம்பியன் (Sarah Champion) ஆகியோரும் கலந்து கொண்டிருந்தமை குறிப்பிடத்தக்கது.

Latest Offers