வலிந்து காணாமல் ஆக்கப்பட்ட பிள்ளைகளின் புகைப்படங்களை வைத்து நிதி திரட்டும் செயற்பாடுகள்

Report Print Suman Suman in சமூகம்

வலிந்து காணாமல் ஆக்கப்பட்ட பிள்ளைகளின் புகைப்படங்களை வைத்து நிதி திரட்டும் செயற்பாடுகளை சில அமைப்புக்கள் முன்னெடுத்து வருவதாக வலிந்து காணாமலாக்கப்பட்டவர்களின் உறவினர்களின் சங்கத்தின் தலைவி குற்றம் சுமத்தியுள்ளார்.

வலிந்து காணாமல் ஆக்கப்பட்டவர்களின் உறவுகள் இன்று கிளிநொச்சியில் உள்ள வடக்கு, கிழக்கு வலிந்து காணாமல் ஆக்கப்பட்ட உறவுகளின் சங்கத்தின் தலைவியின் இல்லத்தில் இன்று ஊடக சந்திப்பு ஒன்றை ஏற்பாடு செய்திருந்தனர்.

இதன்போது ஊடகங்களிற்கு கருத்து தெரிவிக்கையிலேயே இவ்வாறு தெரிவித்துள்ளார். அவர் மேலும் தெரிவிக்கையில்,

எமது பிள்ளைகளை வைத்து இன்று பணம் திரட்டும் செயற்பாடுகள் இடம்பெற்று வருகின்றது. இந்த செயற்பாட்டை சில அமைப்புக்களும் முன்னெடுக்கின்றனர்.

அதேபோன்று தற்போது தனி நபர்களும் ஆரம்பித்துள்ளனர். கிளிநொச்சி வன்னேரிகுளம் பகுதியை சேர்ந்த தாயாரின் பிள்ளையின் புகைப்படத்தை வைத்து இருவர் நிதி சேகரித்துள்ளனர்.

இந்த தாயாரின் பிள்ளை படையினரின் கட்டுப்பாட்டிற்குள் சென்ற போது இந்த புகைப்படம் அடங்கலான பல ஆவணங்களோடு சென்றிருந்தார். இந்த புகைப்படம் எவ்வாறு இவர்களிற்கு கிடைத்தது. இந்த உண்மையை அரசியல்வாதிகளும், எமது தமிழ் தலைமைகளும் உணரவேண்டும். அவர்கள் உணர்ந்து செயற்பட வேண்டும்.

குறித்த ஊடக சந்திப்பில் கிளிநொச்சி - வன்னேரி குளம் பகுதியை சேர்ந்த இந்திராதேவி என்ற தாயார் தெரிவிக்கையில்,

எனது மகளான ஜெயமதி 2009ம் ஆண்டு இறுதி யுத்தம் நிறைவு பெற்றபோது இராணுவத்திடம் சரணடைந்தது முதல் தேடி வருகின்றோம். இந்த நிலையில் கடந்த மாதம் 5ம் திகதி எனது மகளின் புகைப்படத்துடன் ஒருவர் எமது பிரதேசத்தில் நிதி சேகரிப்பில் ஈடுபட்டிருந்தார்.

அவரை நாம் அக்கராயன் பொலிசாரிடம் ஒப்படைத்தோம். எனது மகள் இந்த புகைப்படம் மற்றும் ஏனைய புகைப்படங்கள் உள்ளிட்ட பல ஆவணங்களுடன் இராணுவ கட்டுப்பாட்டிற்குள் சென்றிருந்தார்.

அவரை அன்று முதல் நாம் காணாதவர்களாக போராட்டத்தில் ஈடுபட்டு வருகின்றோம். இந்த நிலையில் இவரது புகைப்படத்துடன் சிலர் இவ்வாறான செயற்பாட்டில் ஈடுபட்டிருந்தனர். இந்த நிலையில் எனது பிள்ளையை கண்டுபிடித்து தாருங்கள் எனவும் ஊடகங்கள் ஊடாக கோரிக்கை விடுத்துள்ளார்.

Latest Offers