நன்னீர் மீன் இனங்களின் விலை அதிகரிப்பு-நுகர்வோர் விசனம்

Report Print Varunan in சமூகம்

அம்பாறை மாவட்டத்தில் நன்னீர் மீன் இனங்களின் விலை அதிகரித்துள்ளதாக பொதுமக்கள் விசனம் வெளியிட்டுள்ளனர்.

அம்பாறை மாவட்டத்தில் ஆறு மற்றும் குளம் ஆகியவற்றில் குறைந்தளவு மீன் இனங்கள் பிடிக்கப்படுவதனால் அதன் விலைகள் அதிகரித்துள்ளதாக தெரிவிக்கப்படுகிறது.

சம்மாந்துறை, கல்முனை பொலிஸ் பிரிவிற்குட்பட்ட மாவடிப்பள்ளி பாலம் கிட்டங்கி பாலத்திற்கருகே சிறிதளவாக பிடிக்கப்படும் சிறு மீன் முதல் பெரிய மீன்கள் என்றும் இல்லாத வகையில் அதிகரித்த விலையில் விற்பனை செய்யப்பட்டு வருகின்றது.

குறித்த மீன்கள் யாவும் எறிதூண்டல், அத்தாங்கு மற்றும் எறி வலை மூலம் பிடிக்கின்றதுடன் மீன்களின் விலையேற்றத்திற்கு காரணம் சட்டவிரோத இழுவை வலை தங்கூசி வலை பயன்பாடு என மீனவர்கள் தெரிவித்துள்ளனர்.

அத்துடன் குறித்த வலைப்பாவனை காரணமாக மீன்களின் இனப்பெருக்கம் பாதிக்கப்படுவதுடன் நீர்வாழ் தாவரங்கள் அழிவடைந்துள்ளதாக அப்பகுதி மீனவர்கள் குற்றஞ்சாட்டியுள்ளனர்.

மழைகாலங்களில் எதிர்நோக்கும் வெள்ள நிலையை அகற்றுவதற்காக தோண்டப்படும் முகத்துவாரம் காரணமாக நன்னீருடன் உவர் நீர் கலப்பதன் காரணமாக நன்னீர் மீன்கள் பெருக்கம் செய்யும் தாவரங்கள் அழிவடைந்துள்ளமையினால் மீன்களின் இனப்பெருக்கம் குறைவடைந்துள்ளது.

இவ்வாறு சிறு அளவில் பிடிக்கப்படும் மீன்களே அவ்விடத்தில் மீனவர்களால் விற்கப்படுவதுடன் மக்கள் விலை அதிகரிப்பினால் கொள்வனவு செய்யாமல் திரும்பி செல்வதாகவும் எமது பிராந்திய செய்தியாளர் தெரிவித்தார்.

இதில் கோல்டன், செப்பலி, கணையான், கொய், கொடுவா, கெண்டை, விரால், சுங்கான், விலாங்கு போன்ற மீன்கள் அதிகளவான விலையில் விற்பனை செய்யப்படுவதுடன் இதர மீன்களான கெண்டை(கெளுறு), பனையான், மீசைக்காரன் ஆகியவை குறைந்த விலையில் விற்பனையாகின்றன.

குறித்த நன்னீர் மீன் பிடியானது தற்போது கிட்டங்கி ஆறு, கல்லாறு, கோட்டைக்கல்லாறு ஆறு, மருதமுனை கரச்சைக்குளம் போன்றவற்றில் அதிகளவாக பிடிக்கப்படுகிறமை குறிப்பிடத்தக்கதாகும்.

Latest Offers

loading...