மண்மேடு சரிந்து விழுந்ததில் இரண்டு வீடுகள் உட்பட தொழிற்சங்க அலுவலகமும் சேதம்

Report Print Thirumal Thirumal in சமூகம்

கொட்டக்கலை - பத்தனை நகரில் மண்மேடொன்று சரிந்து விழுந்ததில் இரண்டு வீடுகளும், தொழிற்சங்க அலுவலகமொன்றும் சேதமடைந்துள்ளதாக திம்புள்ள - பத்தனை பொலிஸார் தெரிவித்துள்ளனர்.

மலைநாட்டில் கடந்த சில நாட்களாக கடும் மழை பெய்து வருவதால் மண்சரிவு அனர்த்தங்களும் ஏற்பட்டு வருகின்றன. இந்நிலையில் நேற்றிரவு பத்தனை நகரிலும் மண்சரிவு அனர்த்தம் ஏற்பட்டுள்ளது.

வீடுகள் மற்றும் தொழிற்சங்க அலுவலகத்துக்கு பின்புறத்திலேயே மண்மேடு சரிந்து விழுந்துள்ளது. இதனால் எவருக்கும் காயம் ஏற்படவில்லை.

எனினும், இரு வீடுகளிலும் இருந்த எட்டு பேர் அங்கிருந்து வெளியேற்றப்பட்டுள்ளதுடன், அயலவர்களின் வீடுகளில் தங்கவைக்கப்பட்டுள்ளனர்.

மேலும், மண்ணை அகற்றுவதற்கும், பாதிக்கப்பட்டவர்களுக்கு தேவையான உதவிகளை வழங்குவதற்கும் கொட்டகலை பிரதேச சபையின் தவிசாளர் மற்றும் உபதவிசாளர் ஆகியோர் நடவடிக்கைகளை மேற்கொண்டுள்ளனர்.

இதேவேளை, இன்று காலை முதல் மலைநாட்டில் இடையிடையே மழை பெய்து வருகின்றதுடன், தொடர் மழையால் நீர்த்தேக்கங்களின் நீர்மட்டமும் அதிகரித்துள்ளது.