நீர்த்தேக்கத்தை பார்வையிட சென்ற இளைஞரொருவர் மாயம்! தேடுதல் பணி தீவிரம்

Report Print Theesan in சமூகம்
294Shares

வவுனியா - புதுக்குளம் பகுதியில் அமைந்துள்ள நீர்த்தேக்கத்தினை பார்வையிடுவதற்குச் சென்ற இளைஞரொருவர் நீரில் அடித்துச் செல்லப்பட்ட நிலையில் மாயமாகியுள்ளார்.

அண்மையில் வவுனியாவில் பெய்த கனமழையின் காரணமாக வவுனியா புதுக்குளத்தில் அமைந்துள்ள நீர்த்தேக்கம் நிரம்பியதுடன் மேலதிக நீர் சுருங்கை வழியாக வெளியேறி வருகின்றது.

இதனைப் பார்வையிடுவதற்காக அதிகமான பொதுமக்கள் மற்றும் இளைஞர்கள் குறித்து நீர்த்தேக்கத்திற்குத் தினமும் சென்ற வண்ணமுள்ளனர்.

இந்த நிலையில் நீர்த்தேக்கத்தினை பார்வையிடுவதற்காகக் குறித்த இளைஞர் தனது நண்பர்களுடன் இன்றைய தினம் மதியம் அங்கு சென்றுள்ளார்.

இதன்போது நீர் வழிந்தோடும் வாய்க்கால் பகுதியில் அவர் இறங்கிய நிலையில் நீரில் மூழ்கியுள்ளார்.

இதனை அவதானித்த அவரது நண்பர்கள் நீரினுள் இறங்கி இளைஞரை நீண்ட நேரம் தேடியும் அவரை கண்டறிய முடியவில்லை.

சம்பவம் தொடர்பாக ஈச்சங்குளம் பொலிஸாருக்கும் தெரியப்படுத்தப்பட்டதுடன்,பொலிஸார் மற்றும் பிரதேசவாசிகளால் இளைஞரைத் தேடும் பணி தீவிரமாக முன்னெடுக்கப்பட்டு வருகின்றமை குறிப்பிடத்தக்கது.

குறித்த சம்பவத்தில் தோணிக்கல் பகுதியைச் சேர்ந்த, பண்டாரிக்குளம் விபுலாநந்தா கல்லூரியில் கல்வி கற்கும் மாணவரொருவரே இவ்வாறு காணாமல் போயுள்ளமை குறிப்பிடத்தக்கது.