மட்டக்களப்பு மாவட்ட தபால்மூல வாக்குச் சீட்டுக்கள் தபால் திணைக்களத்திடம் ஒப்படைப்பு

Report Print Rusath in தேர்தல்

எதிர்வரும் பொதுத் தேர்தலில் தேர்தல் கடமைகளில் ஈடுபடும் பணியாளர்கள் தபால் மூலம் வாக்களிப்பதற்கான வாக்குச் சீட்டுக்கள் மட்டக்களப்பு தபால் திணைக்களத்திடம் ஒப்படைக்கப்பட்டுள்ளதாக தெரிவிக்கபப்டுகிறது.

2020ம் ஆண்டிற்கான தேர்தல் கடமைகளில் ஈடுபடும் பணியாளர்கள், பாதுகாப்பு படையினர் அஞ்சல் மூலம் வாக்களிப்பதற்கான வாக்குச் சீட்டுக்கள் பொதி செய்யப்பட்டு அஞ்சல் வாக்களிக்கும் நிலையங்களுக்கு விநியோகிப்பதற்காக தபால் திணைக்களத்திற்கு இன்றையதினம் ஒப்படைக்கப்பட்டுள்ளது.

மட்டக்களப்பு மாவட்டத்தில் தபால் மூலம் வாக்களிப்பதற்காக விண்ணப்பித்த அரச அலுவலர்கள் மற்றும் பாதுகாப்புப் படையினரின் 13,156 விண்ணப்பங்களில் ஏற்றுக்கொள்ளப்பட்ட 12,815 விண்ணப்பங்களுக்கான தபால்மூலவாக்குச் சீட்டுக்களை காப்புறுதி செய்யப்பட்ட தபால்பொதி மூலம் அனுப்பி வைப்பதற்கான நடவடிக்கை, மட்டக்களப்பு மாவட்ட தெரிவத்தாட்சி அலுவலரும் மாவட்ட அரசாங்க அதிபருமான கலாமதி பத்மராஜா தலைமையில் இன்றையதினம் முன்னெடுக்கப்பட்டுள்ளது.

உதவி தேர்தல் ஆணையாளர் சசீலன் மேற்பார்வையில் இவ்வாக்குச் சீட்டுக்களை பொதி செய்யும் நடவடிக்கை 23 நிலையங்களில் கொரோனா தொற்றிலிருந்து பாதுகாப்பதற்கான சுகாதார நடைமுறைகளைப் பின்பற்றி கிரமமாக மேற்கொள்ளப்பட்டுள்ளதாக தெரிவிக்கப்படுகிறது.

இதேவேளை தபால் வாக்குச் சீட்டுக்களை பொதி செய்யும் நடவடிக்கைக்காக மாவட்ட செயலகத்தில் அமைக்கப்பட்டிருந்த 19 நிலையங்களுடன் தேர்தல் அலுவலகத்தில் அமைக்கப்படடிருந்த 4 நிலையங்களிலுமாக 211 உத்தியோகத்தர்கள் கடமையில் ஈடுபடுத்தப்பட்டுள்ளனர்.

பொதி செய்யப்பட்ட வாக்குச் சீட்டுக்களை காப்புறுதி செய்யப்பட்ட தபால் பொதி மூலம் தபால் வாக்காளர்கள் வாக்களிக்கும் 428 நிலையங்களுக்கு அனுப்பி வைப்பதற்காக பிரதி தபால்மா அதிபர் எஸ். ஜெகன் மேட்பார்வையில் மட்டக்களப்பு பிரதம தபாலக, தபால் அதிபர் ஏ. சுகுமார் தலைமையிலான தபால் பணிக்குழுவினர் பொறுப்பேற்றுக் கொண்டுள்ளனர்.

பொதுத் தேர்தல் 2020 இற்கான தபால் வாக்களிப்பு நடைபெறும் தினங்களாக எதிர்வரும் ஜூலை மாதம் 14, 15 ஆம் திகதிகள் தேர்தல்கள் திணைக்களத்தினால் அறிவிக்கப்பட்டுள்ளமை குறிப்பிடத்தக்கது.