வரலாற்றுச்சாதனை படைத்த கிளிநொச்சி இந்துவின் வீரர்களுக்கு சி.சிறீதரன் எம்.பி புகழாரம்

Report Print Dias Dias in அரசியல்

கிளிநொச்சி இந்துக்கல்லூரியில் இன்றைய தினம் 'தேசிய ரீதியிலான துடுப்பாட்டப் போட்டியில் வெற்றியீட்டிய வீரர்களை கௌரவிக்கும் நிகழ்வு இடம்பெற்றுள்ளது.

குறித்த நிகழ்வில் கிளிநொச்சி இந்துக்கல்லூரியின் பழைய மாணவனும், நாடாளுமன்ற உறுப்பினருமாகிய சிவஞானம் சிறீதரன் கலந்துக்கொண்டிருந்தார்.

பாடசாலை மாணவர்களுக்கு இடையிலான தேசிய மட்ட துடுப்பாட்டப் போட்டியில் முதலிடம் பெற்று தங்கப்பதக்கத்தை வென்றெடுத்துள்ள கிளிநொச்சி இந்துக்கல்லூரியின் வீரர்கள் தமது பாடசாலைக்கு மட்டுமன்றி கிளிநொச்சி மாவட்டத்திற்கும், வடக்கு மாகாணத்திற்கும் பெருமை சேர்த்துள்ளார்கள் என தெரிவித்துள்ளார்.

தொடர்ந்தும் கருத்து தெரிவிக்கையில்,

வடக்கு, கிழக்கு மாகாணங்களின் வரலாற்றில் இன்றளவும் இல்லாத பெரும் சாதனைத்தடம் இது. துடுப்பாட்டம் என்பது தென்னிலங்கையர்களுக்கே உரித்தான விளையாட்டு என்னும் மனோபாவத்தை உடைத்தெறிந்து கிளிநொச்சி மாவட்டத்தைப் பிரதிநிதித்துவப்படுத்தும் ஒரு பாடசாலை தென்னிலங்கையின் தேசியப் பாடசாலைகளை வீழ்த்தி தேசியமட்டத்தில் வெற்றிவாகை சூடியிருப்பதை ஒரு வரலாற்றுப் பதிவாகவே என்னால் பார்க்க முடிகின்றது.

இந்த மண்ணுக்கும் மாவட்டத்திற்கும் வரலாற்றுச்சாதனை ஒன்றின் மூலம் பெருமை தேடித்தந்துள்ள கிளிநொச்சி இந்துக்கல்லூரியின் வீரர்களுக்கும், பயிற்றுவிப்பாளர்களுக்கும், பாடசாலைச் சமூகத்திற்கும் பாராட்டுக்களையும், நன்றிகளையும் தெரிவிப்பதோடு, தொடர்ந்தும் பல வெற்றிகளைப் பெற்று இந்த மண்ணிற்கும், எமது மாவட்டத்திற்கும் கௌரவத்தைத் தேடித்தர வேண்டும் எனவும் நாடாளுமன்ற உறுப்பினர் சி.சிறீதரன் தெரிவித்துள்ளார்.

Latest Offers