மைத்திரி - ரணில் அரசை இந்தியாவில் போற்றிப் புகழ்ந்த ஹக்கீம்

Report Print Rakesh in அரசியல்

அடிப்படை மனித உரிமைகள் விடயத்தில் கடந்த மஹிந்த அரசாங்கத்தை விட தற்போதைய மைத்திரி - ரணில் அரசு அதிக கரிசணையுடன் செயற்பட்டு வருகின்றது என ஸ்ரீலங்கா முஸ்லிம் காங்கிரஸ் தலைவரும் நகர திட்டமிடல் மற்றும் நீர் வழங்கல் அமைச்சருமான ரவூப் ஹக்கீம் தெரிவித்துள்ளார்.

இந்தியாவில் நடைபெறும் “முத்தமிழறிஞர் கலைஞருக்கு இஸ்லாமிய சமுதாயம் நிகழ்த்தும் நினைவேந்தல்” நிகழ்வில் சிறப்பு அழைப்பாளராக கலந்துகொள்வதற்காக ரவூப் ஹக்கீம் இன்று சென்னை சென்றடைந்துள்ளார்.

ரவூப் ஹக்கீமுக்கு சென்னை விமான நிலையத்தில் அமோக வரவேற்பளிக்கப்பட்டதோடு, இந்திய யூனியன் முஸ்லிம் லீக் கட்சியின் கடைய நல்லூர் சட்டமன்ற உறுப்பினர் கே.ஏ.எம். முஹம்மது அபூபக்கர் மற்றும் அரசியல் பிரமுகர்களினால் பொன்னாடை போர்த்திக் கெளரவிக்கப்பட்டுள்ளது.

அதன்பின் நடைபெற்ற ஊடகவியலாளர் சந்திப்பில், ஊடகவியலாளர் ஒருவரின் கேள்விக்கு பதிலளிக்கும் போதே ரவூப் ஹக்கீம் மேற்கண்டவாறு தெரிவித்துள்ளார்.

ஊடகவியலாளர்கள் மத்தியில் ரவூப் ஹக்கீம் மேலும் பதிலளிக்கையில் கூறியதாவது,

"தமிழக மீனவர்களுக்கும் இலங்கை மீனவர்களுக்கும் இடையிலுள்ள இழுபறி நிலைக்கு தீர்வுகாண வேண்டும். இதற்காக இரு நாடுகளின் மீனவ சங்கங்கள் உள்ளடங்கலாக வெளியுறவு அமைச்சு மட்டத்திலான குழுக்கள் அமைக்கப்பட்டுள்ளன.

இந்த குழுக்களின் சிபார்சுகளில் நாங்கள் தீவிர கரிசணை செலுத்தி வருகிறோம். இலங்கை, இந்திய நாடுகளின் உறவுகளுக்கு பாதிப்பு ஏற்படாத வகையிலும், மீனவர்களின் வாழ்வாதாரத்தை பாதிக்காத வகையிலும் சுமூகமானதொரு தீர்வை நாங்கள் மேற்கொள்வோம்.

யுத்தம் காரணமாக இந்திய அகதி முகாம்களில் வாழும் இலங்கை தமிழர்களை மீள்குடியேற்றுவதில் சர்வதேச சமூகத்துடன் இணைந்து தேவையான முயற்சிகளை மேற்கொண்டு வருகின்றோம்.

அடிப்படை மனித உரிமைகள் விடயத்தில் கடந்த மஹிந்த அரசாங்கத்தை விட தற்போதைய மைத்திரி - ரணில் அரசு அதிக கரிசணையுடன் செயற்பட்டு வருகின்றது" என தெரிவித்துள்ளார்.

Latest Offers