காலத்தை கடந்து கடவுள் தமிழருக்கு கொடுத்த கொடையே இரா.சம்பந்தன்! சுமந்திரன் புகழாரம்

Report Print Rakesh in அரசியல்
203Shares

காலத்தையும் கடந்து கடவுள் தமிழர்களுக்குக் கொடுத்திருக்கும் கொடை தான் தமிழ்த் தேசியக் கூட்டமைப்பின் தலைவர் இரா.சம்பந்தன் ஐயா. பல இக்கட்டான காலகட்டங்களில் அந்தத் தலைமை எங்களுக்குத் தேவை. அவரை நாங்கள் தூக்கி எறிய முடியாதென தமிழ்த் தேசியக் கூட்டமைப்பின் பேச்சாளரும், யாழ்.மாவட்ட நாடாளுமன்ற உறுப்பினருமான எம்.ஏ. சுமந்திரன் தெரிவித்துள்ளார்.

'ஒருமித்த கருத்தும் ஒருமித்த பயணமும்' என்ற தொனிப்பொருளில் யாழ்.வீரசிங்கம் மண்டபத்தில் நேற்று நடைபெற்ற கருத்தறியும் கலந்துரையாடலில் உரையாற்றிய போதே அவர் மேற்கண்டவாறு தெரிவித்துள்ளார்.

இதன்போது அவர் அங்கு மேலும் தெரிவிக்கையில்,

காலத்தையும் கடந்து கடவுள் எங்களுக்குக் கொடுத்திருக்கும் கொடையே சம்பந்தன் ஐயா. நாங்கள் இன்னமும் பாக்கியம் பெற்றவர்கள்.

அவரை நாங்கள் தூக்கி எறியப்போவதில்லை. அவரால் இயன்றவரை அவர் எங்களை வழிநடத்துவார். முன்னே நின்று வழிநடத்துவார். அவர்தான் எங்கள் முகமாக இருப்பார். அதில்தான் எங்கள் பலம் தங்கியிருக்கின்றது. அதற்காக மற்றவர்களுக்கு இடம் இல்லை என்றல்ல.

இளம் தலைவர்களை உருவாக்கவேண்டும் என்பதே நான் பகிரங்கமாகச் சொல்லும் விடயம். கட்சியின் மீது நான் வெளிப்படையாக வைத்திருக்கும் விமர்சனமும் அதுதான்.

இளைஞர்களுக்கு, பெண்களுக்கு கட்சியில் இன்னமும் உரிய இடம் கொடுக்கப்படவில்லை. அதை நான் ஏற்றுக்கொள்கின்றேன்.

சென்ற தேர்தலில் பெண்களுக்கு 50 சதவீதம் எங்கள் நியமனப்பத்திரத்தில் நியமனம் கொடுக்க வேண்டும் என்று பகிரங்கமாகச் சொன்னவன் நான். அந்த முயற்சியில் நான் பெரும் தோல்வியடைந்தேன்.

இன்னுமொன்றை நான் பகிரங்கமாகச் சொல்கின்றேன். இருக்கின்ற நாடாளுமன்ற உறுப்பினர்களுக்கே திரும்பவும் நியமனம் கொடுப்பதாக இருந்தால் எஞ்சிய இடங்கள் கொஞ்சம் தான் உள்ளன.

அதில் நாங்கள் நிறுத்துவது கட்டாயம் தோற்பவர்களை மட்டும் தான். ஏனென்றால் அவர்கள் வென்றால் நாங்கள் தோற்று விடுவோம். அதனால் தான் நான் திரும்பத் திரும்பச் சொல்கிறேன், இருக்கின்ற நாடாளுமன்ற உறுப்பினர்களுக்குத் தானாகவே நியமனம் கொடுக்க வேண்டாம்.

யுத்த காலத்தைக் கடந்து வந்த கட்சி இது. யுத்தகாலத்துக்கு முன்னரும் இருந்தது, யுத்த காலத்துக்குப் பின்னரும் இருந்த கட்சி.

யுத்தகாலத்தில் அடங்கிப் போயிருந்த கட்சி. செயலிழந்திருந்த கட்சி. திடீரென ஜனநாயகப் பண்புகள் வந்து விடாது.

30 வருடம் வேறு விதத்தில் பழகி விட்டோம். சொன்னதைச் செய்தது. யுத்த காலத்தில் கூட பல ஆயுதப் போராட்ட இயக்கங்கள் இருந்தன.

ஒன்று மட்டும் இருக்கவில்லை. அது ஒன்றாக வந்தது எப்படி என்பதும் எல்லோருக்கும் தெரியும். சகோதரப் படுகொலைகளின் மூலமாகத்தான் அது ஒன்றாக வந்தது. அது எல்லோருக்கும் தெரியும்.

2014இல் ஆட்சி மாற்றம் ஏற்பட நாங்கள் ஒரு முக்கிய காரணி. இது பலருக்குத் தெரியாத ஒரு விடயம்.

2012ம் ஆண்டு சோபித தேரர் சமூக நீதிக்கான மக்கள் இயக்கத்தை ஆரம்பித்த போது தேசிய புத்தகசாலையில் ஒரு சிறிய அறையில் அந்தக் கூட்டம் நடந்தது. அந்த முதல் கூட்டத்திலேயே நான் பேசினேன்.

நாங்கள் அந்த மாற்றத்துக்கு அடிகோலிகளாகஇருந்திருக்கின்றோம். இரண்டு தடவைகள் நான் சம்பந்தனையும் அழைத்துக்கொண்டுபோய் அவர்களின் விகாரையில் பேசியிருக்கின்றோம் என்றும் தெரிவித்துள்ளார்.