உள்ளூர் நீதியமைப்பில் நம்பிக்கையில்லை - ரவிராஜ் கொலை வழக்கு சான்று..! உலகத் தமிழர் பேரவை

Report Print Vino in சிறப்பு

இலங்கையின் உள்ளூர் நீதி அமைப்புகளின் மீது தங்களுக்கு நம்பிக்கை இல்லை என்பதனை அண்மையில் ரவிராஜ் கொலை வழக்கில் இடம்பெற்றதினை வைத்து பார்க்கலாம் என உலகத் தமிழர் பேரவை தெரிவித்துள்ளது.

போரில் நடைபெற்ற மனித உரிமை மீறல்கள் மற்றும் குற்றச்சாட்டுக்கள் குறித்து விசாரித்து வரும் நல்லிணக்க ஆலோசனைக்கான செயலணி குழு கடந்த ஜனவரி மாதம் பல முக்கிய பரிந்துரைகளை உள்ளடக்கி ஒரு விரிவான அறிக்கையை வெளியிட்டது.

இதனை வரவேற்ற உலகத் தமிழர் பேரவை, இப்பரிந்துரைகளை செயல்படுத்த வேண்டுமென கேட்டுக் கொண்டுள்ளது. இது குறித்து இந்த அமைப்பு வெளியிட்டுள்ள அறிக்கையில்,

கடந்த ஒரு வருடமாக இலங்கை முழுவதும் கலந்தாய்வு மேற்கொண்ட 11 உறுப்பினர்கள் அடங்கிய நல்லிணக்க ஆலோசனைக்கான செயலணி குழு , முழுமையாக மற்றும் ஒருமனதாக இந்த அறிக்கையை தயார் செய்துள்ளது.

இப்பணியை திறன்பட செய்து முடித்தமைக்கு அவர்களுக்கு எங்கள் பாராட்டுக்களை தெரிவித்து கொள்கிறோம் என தெரிவித்துள்ளது.

இலங்கையின் பல் வேறு சமூக பிரிவுகளை சேர்ந்தவர்கள் செயலணி குழுவின் உறுப்பினர்களாக அங்கம் பெற்றிருப்பதும், வெவ்வேறு சமூகங்களை சேர்ந்த பாதிக்கப்பட்டவர்களின் விருப்பங்கள் மற்றும் கவலைகள் அவர்களின் கலந்தாய்வில் பிரதிபலிக்கப்பட்டுள்ளதும், உலக அளவில் பகிரப்பட்ட மானுட உரிமைகள் மற்றும் கொள்கைகளின் அடிப்படையில் இன மற்றும் மத ரீதியிலான வேறுபாடுகளை தாண்டி இலங்கை சமூகம் செல்ல முடியும் என்ற நம்பிக்கையை எங்களுக்கு அளிக்கிறது'

மேலும் இப்பேரவை வெளியிட்டுள்ள அறிக்கையில், 'தேசிய ஒருமைப்பாடு மற்றும் சமரசம் தொடர்பான அலுவலகத்தின் தலைவரான முன்னாள் இலங்கை ஜனாதிபதி சந்திரிகா குமாரதுங்க, மூன்று முக்கிய இலங்கை அமைச்சர்களின் முன்னிலையில் செயலணியின் விரிவான அறிக்கையை பெற்றுள்ளது.

இந்த அறிக்கை எவ்வளவு முக்கியமானது என்பதையும், சிங்களவர், தமிழர் மற்றும் முஸ்லீம் ஆகிய மூன்று முக்கிய இனங்களுக்கும் இடையேயான இணக்கப்பாடு எந்தளவு அத்தியாவசியமானது என்பதையும் விளக்குகிறது.

இலங்கை போர்க்குற்றம் குறித்து விசாரிக்க சர்வதேச நீதிபதிகளுடன் கலப்பு நீதிமன்றம் அமைப்பதே சிறந்தது என்ற செயலணியின் பரிந்துரை , இலங்கையில் பாதிக்கப்பட்ட தமிழ் சமூகத்தின் கருத்தையொட்டி அமைந்துள்ளது என்று தெரிவித்த உலகத் தமிழர் பேரவை, இலங்கையின் உள்ளூர் நீதி அமைப்புகளின் மீது தங்களுக்கு நம்பிக்கை இல்லை என நீண்ட நாட்களாக வலியுறுத்தப்படும் தமிழ் சமூகத்தின் கருத்தை அண்மையில் வெளிவந்த தமிழ் நாடாளுமன்ற உறுப்பினர் ரவிராஜ் கொலை வழக்கு தொடர்பான தீர்ப்பு வலுப்படுத்தியுள்ளது என்றும் குறிப்பிட்டுள்ளது.

அதனால், இந்த முக்கியமான தருணத்தில் இலங்கை அரசு மிகவும் துணிச்சலாக செயல்பட்டு நல்லிணக்க வழிமுறைகள் ஆலோசனைக்கான செயலணியின் வெளியிட்டுள்ள பரிந்துரைகளை செயல்படுத்த வேண்டுமென்று உலகத் தமிழர் பேரவை தான் வெளியிட்டுள்ள அறிக்கையில் கேட்டுக் கொண்டுள்ளது.

Comments