சஜித் விவகாரம் ரணில் மீது கிடுக்குப்பிடி! அடுத்த நகர்வு?

Report Print Dias Dias in இலங்கை

இன்று காலை நாடாளுமன்றத்தில் கூடிய போது, பின்வரிசை நாடாளுமன்ற உறுப்பினர்கள் இந்தத் வரும் ஜனாதிபதித் தேர்தலில் ஐக்கிய தேசியக் கட்சியின் வேட்பாளராக அமைச்சர் சஜித் பிரேமதாச பெயரிடப்பட வேண்டும் என்று ஐக்கிய தேசியக் கட்சியின் பின்வரிசை நாடாளுமன்ற உறுப்பினர்கள் தீர்மானம் நிறைவேற்றியுள்ளனர்.

ஜனாதிபதி வேட்பாளராக சஜித் பிரேமதாசவும், பிரதமர் வேட்பாளராக ரணில் விக்ரமசிங்கவும் பெயரிடப்பட்டு அறிவிப்பதுடன் தேர்தலுக்கான கட்சியின் பிரசாரப் பணிகள் அமைச்சர் சஜித் பிரேமதாசவிடம் ஒப்படைக்கப்பட வேண்டும் எனவும் தீர்மானித்துள்ளனர்.

சுமார் 30 உறுப்பினர்களைக் கொண்ட இந்தக் குழுவில் 26 உறுப்பினர்கள் இந்தக் கூட்டத்தில் கலந்துகொண்டதுடன் கலந்து கொள்ளாத ஏனைய உறுப்பினர்களும் இதற்கு தமது ஆதரவை வெளியிட்டதாக கூட்டத்தில் கலந்துகொண்ட எம்.பி. ஒருவர் தெரிவித்தார்.

பிரதமர் ரணில் விக்ரமசிங்க, ஜனாதிபதி வேட்பாளரை அறிவிக்க இழுத்தடித்து வரும் நிலையில், ஐ.தே.க. பின்வரிசை உறுப்பினர்கள் கடுமையான தீர்மானத்தை எடுத்துள்ளனர்.

இதே வேளை, சஜித் பிரேமதாசவை ஜனாதிபதி வேட்பாளராக அறிவிக்க வேண்டும் என கையெழுத்திடும் மகஜர் ஒன்றும் ஐ.தே.க. உறுப்பினர்களினால் தயாரிக்கப்பட்டுள்ளது.

இவ்வாறான சூழலில் சில முக்கிய உறுப்பினர்களை மட்டும் இன்று காலை அலரி மாளிகையில் பிரதமர் ரணிலை சந்தித்துப் பேசியுள்ளார்.

ஐ.தே.கவின் ஜனாதிபதி வேட்பாளர் வெற்றி பெறும் பட்சத்தில் அந்தக் கட்சியின் தலைவர் பதவியும் கட்சி யாப்பின்படி புதிய ஜனாதிபதிக்கே வழங்க வேண்டிய கட்டாயம் உள்ளது.

இதனால் கட்சித் தலைமைத்துவத்தை காப்பாற்றுவதில் ரணில் விக்ரமசிங்க தடுமாறுவதனால், ஜனாதிபதி வேட்பாளரை பெயரிடுவதில் ஐக்கிய தேசியக் கட்சிக்குள் தாமதம்.

இந்த நிலையில், பின்வரிசை நாடாளுமன்ற உறுப்பினர்கள் கட்சித் தலைமைக்கு அழுத்தம் கொடுப்பதற்காக கூடிய தீர்மானம் ஒன்றை இன்று காலை நிறைவேற்றியுள்ளனர்.

இன்றைய கலந்துரையாடல்களில் எஸ்.எம். மரிக்கார், லக்ஸ்மன் விஜேமான்ன, ஹேசா விதானகே, சமிந்த விஜேசிறி, இம்ரான் மஹ்ரூப், கே.கே.பியதாச, விஜேலால் ஹெட்டியாராச்சி, ஏ.விஜயதுங்க, சிட்னி ஜயரத்ன, பந்துல லால் பண்டாரிகொட, ரோஹினி கவிரத்ன, துசார இந்துனில் உள்ளிட்ட 26 பின்வரிசை உறுப்பினர்கள் இதில் கலந்துகொண்டனர்.

சஜித்தைக் களமிறங்க வைப்பதில் ஆதரவாளர்கள் தீவிரம்

அமைச்சர் சஜித் பிரேமதாசவை ஜனாதிபதித் தேர்தலில் களமிறங்க வைப்பதில் ஐ.தே.க.வினுள் உள்ள அவரது ஆதரவாளர்கள் தீவிரமாக செயற்படத் தொடங்கியுள்ளனர்.

இதன் ஒரு கட்டமாக எதிர்வரும் ஜனாதிபதித் தேர்தலுக்கான ஐ.தே.க.வின் வேட்பாளரை கட்சியின் செயற்குழு மற்றும் நாடாளுமன்ற உறுப்பினர்கள் குழுவை கூட்டி பெரும்பான்மை ஆதரவுடன் தெரிவு செய்ய வேண்டுமென அவர்கள் கோரிக்கை விடுத்துள்ளனர்.

கட்சித் தலைவர் ரணில் விக்கிரமசிங்கவுக்கு அதனை ஒரு மகஜராக சமர்ப்பிக்கும் வகையில் நாடாளுமன்ற உறுப்பினர்களிடம் கையெழுத்துக்களை சேகரிக்கும் நடவடிக்கையொன்றும் முன்னெடுக்கப்பட்டுள்ளது.

வௌ்ளிக்கிழமை மாலைக்குள் சுமார் 55 நாடாளுமன்ற உறுப்பினர்கள் குறித்த மகஜரில் கையெழுத்திட்டுள்ளதாகவும் தெரிய வந்துள்ளது.

Latest Offers